«Այժմ ակնհայտ դարձավ, որ այլ հետաքրքրություններ կան, քան Ղարաբաղն ու գրաված կամ ազատագրված տարածքները»,- «Առավոտի» հետ զրույցում անդրադառնալով տարածաշրջանային հնարավոր զարգացումներին ու ԼՂՀ կոնֆլիկտի ռազմական զարգացման հեռանկարներին՝ ասաց մոսկվաբնակ իրավապաշտպան Արբակ Խաչատրյանը: Նա գտնում է, որ այդ կոնֆլիկտն ի շահ իր պետության ու հասարակության օգտագործելու հնարավորությունները հայաստանյան կողմն արդեն սպառել է, քանի որ նոր աշխարհաքաղաքական իրավիճակում բոլորովին այլ գերակայություններ կան: Այժմ Հայաստանի թիվ մեկ խնդիրը նա համարում է արտագաղթը եւ ոչ թե ԼՂՀ կոնֆլիկտի կարգավորումը: Ցավոք, այս իրավիճակում նա չի բացառում այնպիսի զարգացումներ, որ այլեւս Հայաստանում էլ հասարակությունն անտարբեր վերաբերվի այդ տարածքների ճակատագրին: «Մենք հաղթանակ ունեինք ու հավատ, բայց հիմա դրանք կորցրինք՝ տասնամյակներ կամա եւ ակամա նպաստելով Ադրբեջանի հզորացմանը: Միայն կարող ենք օգտագործել տարածաշրջանի խաղաղությունը՝ նոր քաղաքական ուժ ստեղծելու համար, որի հետ հետագայում հաշվի նստեն: Բայց դա շատ զգույշ ու լավագույնս հաշվարկված պետք է լինի»:
«Առավոտ» օրաթերթ
