Բաց նամակ արդարադատության նախարար Հրայր Թովմասյանին
Մեծարգո պարոն նախարար, մեզ շատ հուզեց այն, որ Ազգային ժողովի ամբիոնից հայտարարեցիք, որ չեք քնել եւ այնպես եք «մշակել» համաներման որոշումը, որ ինչ-որ չափով դատապարտյալների պատժաչափը կմեղմացվի: Մենք ծանոթանալով «Համաներման մասին» որոշման 9-րդ կետին՝ հասկացանք, որ Դուք իզուր չեք քնել, կարող էիք հանգիստ քնել, դրա համար անհանգստանալու կարիք չկար: Մենք ուզում ենք մի քանի հարց տալ Ձեզ մամուլի միջոցով, քանի որ Ձեզ կամ Ձեր տեղակալներին չենք կարողանում հրավիրել «Սեւան» քրեակատարողական հիմնարկ:
1. Համաներումը տարածել այն անձանց վրա, ովքեր կմուծեն քաղհայցերը: Մոռացել էիք գրել, թե որտեղից պետք է վերցնեն այդ գումարները: ՔԿՀ-ում աշխատանք չկա, տունը վաճառե՞նք, որ հետո դուրս գանք՝ ավելի վատ վիճակի մեջ ընկնե՞նք, իսկ ոմանք էլ ընդհանրապես ոչինչ չունեն, եթե ցանկանում եք օգնել բոլոր տուժողներին, ապա պայմաններ ստեղծեիք, որպեսզի դատապարտյալները կալանքի ընթացքում կարողանային մի որոշ չափով վերադարձնեին քաղհայցերը եւ այլ գումարներ եւ ոչ թե «կատարելագործեն իրենց մասնագիտական կարողությունները»: Թե չէ՝ ինչ է ստացվում. եթե քաղհայցը չմուծեն, ուրեմն կալանքը չի մեղմացվի եւ դրանով դատապարտյալները պատիժը կկրեն օրացուցային, դրանից ոչ ոք չի օգտվի (մի՞թե կալանքը օրացուցային կրելուց հետո նախկին դատապարտյալը քաղհայցը կմուծի): Դա աբսուրդ է, եւ այդ մասին բոլորը գիտեն: Դրա համար ՔԿՀ-ներում աշխատատեղեր պետք է ստեղծել, կամ այլընտրանքային կալանքի ձեւ ստեղծել եւ պարտադրել քաղհայցը մուծել: Ստացվում է՝ մի հանցագործության համար երկու պատիժ է ստանում մեղադրյալը, որից մեկը պարտադիր կատարվում է, իսկ մյուսը այդպես էլ մնում է թղթի վրա գրված, եւ տուժում է միայն բողոքող քաղաքացին:
2. Արդեն մեկ ամսից ավելի է, բայց մենք՝ դատապարտյալներս, ոչինչ չգիտենք, թե ում ինչ է հասնում: Անգամ կոմունիստների ժամանակ այսպիսի տեխնիկա չկար, ինչպես հիմա, սակայն 2 օրվա մեջ բոլոր դատապարտյալները իմանում էին իրենց սպասվելիք հույսերը: Եվ ամենավերջինը, Ձեր գովաբանած համաներման թվաբանական գործակիցը ի ցույց Ձեզ՝ համաներումը կիրառել 8 կետով բաղկացած որոշումներից, իսկ համաներումը չկիրառել 21 կետից բաղկացած որոշումներից: Ահա Ձեզ մարդասիրական համաներում:
Կարդացեք նաև
«Սեւան» ՔԿՀ
18 դատապարտյալ
«Առավոտ» օրաթերթ
