Երեկ Մաշտոցի պողոտայում ակտիվիստների եւ ոստիկանների միջեւ տեղի ունեցած բախման հետեւանքով 16-ամյա մի երիտասարդ է վնասվածքներով տեղափոխվել «Սուրբ Աստվածամայր» բժշկական կենտրոն, որը սակայն բուժզննում անցնելով դուրս է գրվել: Այս մասին Aravot.am-ին հայտնեցին առողջապահության նախարարությունից: Միջադեպից տուժած ոստիկանների բուժումը շարունակվում է
«Սուրբ Գրիգոր Լուսավորիչ» եւ «Մալաթիա» բժշկական կենտրոններում: Այս պահի հիվանդանոցային բուժում են ստանում 4 ոստիկան, որից երկուսը գտնվում են «Մալաթիա» բժշկական կենտրոնի նյարդաբանական բաժանմունքում: Այստեղ բուժվող ոստիկաններից մեկը երեկ տեղափոխվել է թիվ 1 համալսարանական հիվանդանոցից: Ըստ նույն աղբյուրի ոստիկաններից մեկի մոտ ախտորոշվել է ուղեղի ցնցում, իսկ մյուսը վնասվածքներ ունի ճակատային հատվածում:
Ոստիկաններից 2-ը, որոնք բուժօգնություն են ստանում «Սուրբ Գրիգոր Լուսավորիչ» բժշկական կենտրոնում` հիվանդանոց են տեղափոխվել մեկը գանգուղեղի, իսկ մյուսը` ոտքի հատվածում ծակած վնասվածքով:
Լուսինե ԲՈՒԴԱՂՅԱՆ
