Խորհրդային միության ժամանակ Հայաստանում ԽՍՀՄ պատմությունն անցնում էին 5-ից 10-րդ դասարաններում, իսկ «Հայ ժողովրդի պատմությունը» ընդամենը երկու տարի, և դասագրքերի ծավալն էլ ավելի փոքր էր: Գրում է «Բի Բի Սի»-ի ռուսական ծառայությունը՝ Խորհրդային և անկախ Հայաստանների պատմության դասագրքերի մասին զուգահեռներ անցկացնող նյութում:
Խորհրդային միության փլուզումից հետո դպրոցական ծրագրի մեջ մտավ «Համաշխարհային պատմություն» և «Հայոց պատմություն» դասերը:
Ըստ լրատվականի, երկու առարկաներն էլ հայակենտրոն են՝ հիմնական թեման հայերի պատմությունն է, որը ներկայացված է համաշխարհային պատմության ընդհանուր ֆոնի վրա:
«Նոր դասագրքերն ավելի են ազգայնականացված», – պնդում է երևանյան դպրոցի պատմության դասատու Արթուր Զարգարյանը: Խորհրդային դասագրքերի հետ համեմատած՝ փոխվել է նաև պատմական փաստերի գնահատումը. «Երկրորդական են դարձել այնպիսի իրադարձությունները, ինչպիսիք են Կոմունիստական կուսակցության նյութերը կամ բոլշևիկյան հեղափոխությունը, որոնք, իհարկե, նույնպես ընդգրկված են դասագրքերում», – ասում է Զարգարյանը:
Կարդացեք նաև
ՀԽՍՀ դասագրքերում Հայաստանում խորհրդային կարգերի հաստատումը ներկայացված էր որպես հայ ժողովրդի ազատագրման կարևոր իրադարձություն: Ներկայիս դասագրքերում այն ներկայացված է որպես Հայաստանի համար անխուսափելի քայլ՝ պայմանավորված «միջազգային անբարենպաստ իրավիճակով, 1920թ. առանց պատերազմ հայտարարելու Թուրքիայի հարձակմամբ», – ասում է ԵՊՀ պատմության ֆակուլտետի դեկան Էդիկ Մինասյանը:
Դպրոցականներին նաև սովորեցնում են հարևան երկրների հարաբերությունների, վերջին տարիների տարածքային և ռազմական հակամարտությունների մասին:
«Խորհրդային դասագրքերում Օսմանյան կայսրության իրագործած Հայոց ցեղասպանության թեման շրջանցում էին», – ասում է Զարգարյանը՝ նշելով, որ այժմ Հայոց ցեղասպանության դասերն ընդգրկված են 8-րդ դասարանի ծրագրում:
Պատրաստեց Հովհաննես ԻՇԽԱՆՅԱՆԸ
