Այսօր Մաշտոցի պողոտայում հեղափոխականների ու ոստիկանների բախման արդյունքում քաղաքացիական հագուստով մի տղամարդու գլուխ ամբողջովին արյունլվա էր եղել:
Նա, գլուխը բռնած, մի կերպ ազատվեց ոստիկանների շղթայից եւ արագ վազելով անհետացավ փողոցից: ՀՀ փոխոստիկանապետ Հունան Պողոսյանն էլ ասաց, որ ոստիկան է դանակահարվել: Հեղափոխականներին բերման ենթարկելուց հետո դեպքի վայրում սկսվեցին քննչական գործողություններ: Փակվեց ոչ միայն Մաշտոցի պողոտան, այլեւ Ազատության հրապարակը, առգրավվեցին նստացույց անող, հեղափոխական Շանթ Հարությունյանի իրերը, երթի համար նախատեսված ձեռնափայտերը:
Շանթ Հարությունյանի աջակիցներն էլ գոռալով ամոթանք տվեցին ոստիկաններին՝ ասելով գնացեք Սուրիկ Խաչատրյանի տան զենքերն այդպես առգրավվեք:
Դեպքի վայր եկած հրահանգներ տվող Երեւանի ոստիկանապետ Աշոտ Կարապետյանն էլ դեպքի մասին չցանկացավ խոսել, միայն ասաց՝ «անկարգություններ են եղել: Այս պահին ոչինչ չեմ կարող ասել»: Նրա հրահանգը ոստիկաններին մեկն էր. «Ով որ չի կատարի օրինական պահանջը բերման ենթարկեք»:
Կարդացեք նաև
Այս հրահանգը տալուց հետո հաջորդ հրահանգը տվեց իր տեղակալին՝ Վալերի Օսիպյանին, ով դեպքի վերաբերյալ լրագրողների հարցերին էր պատասխանում:
«Ոչ մի լրագրող, ես արգելում եմ դու շփվես»,- ասելով իր հետ տարավ Օսիպյանին՝ ասելով. «Գնա գործդ արա»:
Արփինե ՍԻՄՈՆՅԱՆ
