Օրեր առաջ Սփյուռքի տասնյակ նշանավոր հայեր, որոնց թվում են Ատոմ Էգոյանը, Դիանա Տեր-Հովանեսյանը, Արսինե Խանջյանը, Սերժ Թանկյանը, Սկաուտ Թուֆանկջյանը, միացել են Հայաստանում` բոլորի համար հավասարության և արդարության ապահովման մասին հայտարարությանը` հանդես գալով ի պաշտպանություն միասեռականների:
Տեղի հայ մտավորականությունը բավականին բացասական արձագանքեց այս փաստին, ու նրանք կոչ արեցին Սփյուռքի իրենց գործընկերներին «հեռվից հեռու խրատ չտալ»:
Aravot.am-ը բանաստեղծուհի, հրապարակախոս Մարինե Պետրոսյանից հետաքրքրվեց` տեղի՞ն էր այս աղմուկը, թե՞ ոչ: Նա պատասխանեց. «Արձագանքն էր տարօրինակ, նամակը` բնական էր: Մարդիկ, որ նույնասեռականների նկատմամբ վատ վերաբերմունք ունեին, հասկանալի էր, բայց զարմանալին այն էր, որ ավելի լայն շրջանակներ ներգրավվեցին: Իրականում հարցը երբեմն արհեստականորեն Մոսկվայից սրվում ու քաղաքականացվում է»:
Մեր հարցին` կստորագրեի՞ք նամակի տակ, Մարինե Պետրոսյանն այսպես արձագանքեց. «Նամակներ չեմ սիրում, թե չէ ընդհանրապես կստորագրեի: Ես նրանց տրամաբանությունը հասկանում են: Իմ կարծիքն այդ հարցերի վերաբերյալ ես միշտ արտահայտել եմ: Ինչ վերաբերում է այն շահարկումներին, թե հարցը մարգինալացվում է, ասեմ, որ կոնկրետ այս դեպքում կարծիք հայտնողները սփյուռքի մեր հայտնի հայրենակիցներն էին ու այն վերաբերմունք էր ոչ միայն միասեռականությանը, այլև մարդկային ազատությանը»:
Կարդացեք նաև
Հետաքրքրվեցինք` ինչո՞վ է ձեռնտու ռուսական կողմին նման հարցերի սրումը, բանաստեղծուհին պատասխանեց. «Դա կապված է ՌԴ քաղաքականության, կոնկրետ Մաքսային միության հետ: Ռուսաստանը տարածաշրջանում մրցակցում է Ամերիկայի, Եվրոպայի հետ, ու նույն մրցակցությունը կար Սառը պատերազմի տարիներին, որի հիմքում էր կոմունիզմի գաղափարախոսությունը: Հիմա դա չկա, ՌԴ-ն կոմունիզմից ավելի ռեակցիոն գաղափարախոսություն է ընտրել, որը կապվում է եկեղեցու հետ: Ներկայացվում է, թե Արևմուտքը այլասերության, իսկ ՌԴ-ն հոգևոր բարոյականության մարմնացումն է: Ու այն կազմակերպությունները, ասենք Ծնողական կոմիտեն, որ պաշտպանում են այդ ամենը, ՌԴ-ից եկող կազմակերպություններ են: Կապված այն հարցի հետ` միասեռականներն ունե՞ն պաշտպանության կարիք, ասեմ, որ նրանք ամենուր ունեն պաշտպանության կարիք, քանի որ փոքրամասնություն են»:
Դերասան, սցենարիստ Նարեկ Դուրյանը նույն հարցի կապակցությամբ փոխանցեց իր դիրքորոշումը. «Ես երբեք չեմ ասում, որ սեռական փոքրամասնություններին գնդակահարենք, բայց նաև իրենց չպիտի խանգարել: Ես դեմ եմ, որ նրանք երեխա ունենան, որդեգրեն, իմ երեխաները դա տեսնեն, որ դա ներկայացվի որպես բնական երևույթ է և որպես «օրենք»:
Իսկ այն կարծիքներին, թե խնդիրը քաղաքականացվում է, պարոն Դուրյանն այսպես արձագանքեց. «Որ իմանաք, թե ինչպես այդ հարցերն ինձ չեն հետաքրքրում…»:
Տաթև ՀԱՐՈՒԹՅՈՒՆՅԱՆ
Մարինե Պետրոսյանի լուսանկարը՝ Բուն TV-ի
