«Այն ընթացքը, որի մեջ է Հայաստանը, իշխանությունը ազդեցություն չունի եւ տպավորություն է, որ չի էլ ուզում ունենալ: Կարծես լեռնային գետում ընկած տաշեղ լինենք, որ գետը ուր ուզի կքշի… Ամեն ինչ հնարավոր է, բայց այդ հնարավորությունների մեջ այդ տաշեղի դերը զրո է: Այսօր նախ ռազմավարական կարեւորության հարցեր պետք է Հայաստանը լուծի, առաջինը` չկանգնեցնել մերձեցման պրոցեսները Եվրոպայի հետ եւ երկրորդը` խուսափել մտնել որեւէ պարտավորությունների տակ, Ռուսաստանի կողմից ու միեւնույն ժամանակ` պետք է անել ամեն ինչ, երկրի համար ներքին պաշար ապահովելու համար, որովհետեւ Հայաստանը այսօր մեծ ճնշումների մեջ է»,-այսօր «Բլից ինֆո» ակումբում ասաց «Քաղաքական եւ միջազգային հետազոտությունների հայկական կենտրոնի» փորձագետ Ռուբեն Մեհրաբյանը:
Ռուբեն Մեհրաբյանի ձեւակերպմամբ` պետք է փոխել տիրող իրավիճակը, որովհետեւ, այն երկիրը զրոյացնում է միջազգային հարաբերությունների թատերաբեմում, իսկ դա վտանգավոր է ազգային անվտանգության տեսակետից:
Ռուբեն Մեհրաբյանի խոսքով`«Քաղաքականությունից օտարված հասարակությունը պետք է գա այն եզրակացության, որ մեր երկիրը դա մեր երկիրն է եւ ոչ թե, մի իշխանական կամ ընդդիմադիր քեռի որոշելու է մեր փոխարեն»,- նշեց նա, հավելելով, թե քանի մենք քնած ենք` ժամանակն աշխատում է ի վնաս մեզ:
Եվա ՀԱԿՈԲՅԱՆ
