Արարատ քաղաքում, քաղաքապետի ընտրության քարոզարշավի ընթացքում արարատցիներին բաժանված՝ ՀՀԿ թեկնածու Հայկ Հայկյանի նախընտրական բուկլետի ներդիրը, չգիտես ինչու, պատմում է ոչ թե թեկնածուի մասին, այլ նկարագրում է Գրիգորյան եղբայրների կատարած աննախադեպ բարեգործությունները։
Փաստորեն, Արարատ քաղաքում ինչ որ կատարվել է համայնքային բյուջեի հաշվին՝ Գրիգորյան եղբայրները վերագրել են իրենց աննախադեպ բարեգործական ոգուն՝ քաղաքի ասֆալտապատում, բնակելի շենքի կառուցում, հիվանդանոցի հիմնանորոգում եւ սարքավորումներով հագեցում։
Սակայն, ողջ այս պատմության ամենաուշագրավ հատվածը պետական բյուջեով արվածի հեղինակային իրավունքի սեփականաշնորհումը չէ։ Սույն ներդիրի կետ 12-ում բարեգործ եղբայրները նշել են. «Սոցիալապես անապահով ընտանիքներին օգնություն՝ սննդի տեսքով ճաշարանում», իսկ դրույթ 13-ում արձանագրել՝ «Օժանդակություն քաղաքացիներին՝ տոնական օրերին»։
Պակաս ուշագրավ չեն նաեւ բուկլետի ներդիրի հաջորդ երկու դրույթները՝ «Ֆինանսական օգնություն դպրոցներին՝ մարտի 8-ի եւ վերջին զանգի կապակցությամբ», ինչպես նաեւ՝ «օգնություն քաղաքացիներին, դիմողներին՝ ապահովում աշխատանքով»։
Կարդացեք նաև
Ի դեպ՝ հատկապես վերջին պարբերությունը գրավեց մեր ուշադրությունը։ Պարզվում է՝ արտագաղթի, գործազրկության մեջ լճացող Հայաստանում կա մի «տոչկա», ուր մարդիկ կարող են դիմել եւ տեղում իրենց կապահովեն աշխատանքով։ Այդ «տոչկան» Գրիգորյան եղբայրներն են։ Չենք կասկածում, որ աշխատանք փնտրող մեր հայրենակիցները չեն ալարի, կհասնեն Արարատ ու կդիմեն մեր երկրի թիվ մեկ գործատու եղբայրներին։
Իսկ ինչ վերաբերում է վերոշարադրյալ «բարեգործություններին»՝ մարտի 8-ին ու վերջին զանգին դպրոցներին մի քանի կոպեկ տալուն, կամ սոված դիմումատուին հացի փող տալուն, իրեն հարգող ցանկացած բարերար անհարմար կզգար նման «աննախադեպ» բարեգործությունները ֆիքսել թղթի վրա ու բաժանել Արարատ քաղաքի ընտրողներին։ Սակայն, սա եւս ճաշակի հարց է, ինչպես նաեւ՝ մի կտոր տված հացը երեսով տալը։
Գոհար ՎԵԶԻՐՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
