Վերջերս Հայաստանում տեղակայված ռուսական 102-րդ ռազմաբազայի հրամանատար, գնդապետ Անդրեյ Ռուզինսկին ասել էր հետեւյալը․ «Ադրբեջանի ղեկավարության կողմից Լեռնային Ղարաբաղի նկատմամբ ուժային ճանապարհով իրավասության վերականգնման վերաբերյալ որոշման դեպքում Հայաստանում տեղակայված 102-րդ ռազմաբազան կարող է ներգրավվել զինված հակամարտությունում՝ ՀԱՊԿ-ի շրջանակում Ռուսաստանի ստանձնած պարտավորությունների համաձայն»:
Բանսկա Բիստրիցայի համալսարանի (Սլովակիա) հրավիրված գիտաշխատող, քաղաքագետ Արմեն Գրիգորյանը «Առավոտ»-ի հետ զրույցում անդրադառնալով ռուս գնդապետի վերոնշյալ հայտարարությանը՝ նկատեց, թե գնդապետ Ռուզինսկու ասածը նման է՝ «դառը հաբը քաղցրացնելու միջոցի, որով փոխլրացվում է «անվտանգության» հայտնի փաստարկը»:
«Ռուսաստանի հետ վասալային հարաբերությունների պահպանման եւ խորացման կողմնակիցները կարող են պնդել, որ Ռուսաստանը երաշխավորել է, որ կմիջամտի Ադրբեջանի հետ լայնածավալ բախման դեպքում: Կարծում եմ, որ Ռուզինսկու ասածը նաեւ Ադրբեջանին ուղղված հերթական «մեսիջ» էր, որով, ինչպես նաեւ Մինսկում Ա.Լուկաշենկոյի արված հայտարարությամբ, ակնարկում են, որ Ադրբեջանը պետք է լրջորեն մտածի Մաքսային միությանն անդամակցելու մասին: Ադրբեջանի անհամաձայնության դեպքում պետք չէ նաեւ լիովին բացառել զարգացման այլ տարբերակ. Ռուսաստանը կարող է դիմել սադրանքի ԼՂ հակամարտության գոտում, որպեսզի այդ պատրվակն օգտագործի «խաղաղարարներ» մտցնելու համար», ասաց քաղաքագետը:
Կարդացեք նաև
Բանսկա Բիստրիցայի համալսարանի հրավիրված գիտաշխատող Արմեն Գրիգորյանի հարցազրույցն ամբողջությամբ կարող եք կարդալ վաղվա «Առավոտ»-ում:
Էմմա ԳԱԲՐԻԵԼՅԱՆ
Արմեն Գրիգորյանը իրավացի է։ Ռուսների հաջորդ քայլը լինելու է շանտաժը Ադրբեջանի նկատմամբ։ ԼՂ–ի անկախությունը ճանաչելու սպառնալիքով ռուսները փորձելու են ստիպել ալիևին մտնելու ՄՄ մեջ։ Այդ ճանապարհին չի բացառվում նաև սադրանքները։