2014 թվականի պետական բյուջեի քննարկումների ժամանակ այսօր խորհրդարանում ՀԱԿ պատգամավոր Արամ Մանուկյանը դարձյալ գազի սակագնի հարցը բարձրացրեց`դիմելով ՀՀ էներգետիկայի նախարար Արմեն Մովսիսյանին: Պատգամավորը վերհիշեց ամիսներ տեւած իր հարցումներն ու հարցադրումներն այս առիթով, պաշտոնական պատասխանները ու հետաքրքրվեց` ի վերջո, ինչպես է լուծվելու գազի գնի թանկացումից հետո առաջացած իննսուն դոլար տարբերության հարցը. Դա ՀՀ կառավարությա՞ն պարտքն է, թե՞ ՌԴ կառավարությունն այն կսուբսիդավորի: Ի դեպ, գալիք տարվա բյուջեում այդ հարցը որեւէ կերպ արտացոլված չէ:
Նախարար Արմեն Մովսիսյանը մի փոքր ավելի համառոտ պատմեց այս ամիսների ընթացքում ռուսական կողմի հետ բանակցությունների եւ ձեռք բերված համաձայնությունների մասին: Ասաց, որ համաձայնության եկել են, խնդիր կար հարցն իրավական հարթությունում կարգավորելու, փաստաթուղթը ստեղծվեց, հետո առաջացավ Հայաստանի`ՄՄ-ին միանալու խնդիրը: Հիմա հարցը դրա ներքո է կարգավորվում ու մինչեւ նոր տարի համաձայնագիրը կստորագրվի:
Պատասխանելով Արամ Մանուկյանի ուղիղ հարցին, Արմեն Մովսիսյանն ասաց, որ գազի գինը կսուբսիդավորի ռուսական կողմը. «Ես չեմ կարծում, որ մեր պայմանավորվածություններից մեր գործընկերները կհրաժարվեն»:
Ի դեպ, Էներգետիկայի նախարարության գալիք տարվա բյուջեն կկազմի 13 միլիոն 358 միլիարդ դրամ:
Կարդացեք նաև
Նելլի ԳՐԻԳՈՐՅԱՆ
