Այսօր «Տեսակետ» ակումբում «Վերելք» քաղաքական ուսումնասիրությունների հիմնադրամի նախագահ Արծրուն Պեպանյանը խոսեց Հայաստանի քաղաքական կուսակցությունների մասին:
«Ասել էի, որ եթե կուսակցություններն իրենց գործելաոճում ոչինչ չփոխեն՝ հայտնվելու ենք խորը ճգնաժամի մեջ: Եվ այսօր մենք այդ վիճակում ենք, պետությունը գտնվում է կազմաքանդման փուլում, այն նման է մի զգեստի, որը ցանկացած պահի կարող է պոկվել»,- այս կարծիքին է Արծրուն Պեպանյանը:
Նա նաեւ նշեց, որ տարիներ առաջ էր նշել, որ մեր կուսակցությունները բարոյապես մեռնելու են:
Արծրուն Պեպանյանը փորձել է հասկանալ, թե ինչ էին մտածում մեր մեծերը եւ այն ներառել «Մեր մեծերը մեր հիմնախնդիրների մասին գրքում»:
Կարդացեք նաև
«Հանրությունը ընդդիմության հետ հույս չի կապում, իսկ իշխանությունը միջին մտածողության արդյունք է: Իշխանական համակարգը բաղկացած է այնպիսի մարդկանցից, որոնք դժվար թե կարողանան հասկանալ, թե ինչ պետք է անել իրավիճակից դուրս գալու համար: Եթե վաղը Սերժ Սարգսյանը որոշի արմատական փոփոխություններ անել, ապա նա չի գտնի այնպիսի մարդիկ, որոնց վրա կարելի է հենվել: Մենք ունենք հուսահատ իրականություն, որը կարող է երկրի մահացության պատճառ դառնալ: Այս իրավիճակը մյուս կողմից էլ լավն է, քանի որ այժմ մտածող մարդկանց համար ավելի հեշտ է բաց խոսել»,- համոզված է Արծրուն Պեպանյանը:
Եվա ՀԱԿՈԲՅԱՆ
