Նոյեմբերի 1-ին «Ուլիխանյան» ակումբում տեղի ունեցավ «Հայարդ» խմբի առաջին «Sword of Damocles» (Դամոկլյան սուր) տեսահոլովակի շնորհանդեսը: «Sword of Damocles»-ը ատոմային ռումբի մասին է: Խումբը ցանկանում է ցույց տալ իր բացասական վերաբերմունքը այդ երևույթի նկատմամբ:
Միջոցառմանը ելույթ ունեցան «ArTa» և «Second Moon» ռոք խմբերը: Համերգի ընթացքում խմբի մենակատար Սերգեյ Միրզախանյանին փոխարինել էր Այդին Դավուդին, քանի որ Սերգեյը գտնվում է Ռուսաստանի դաշնությունում: «Հայարդ» խմբի հարվածահար Արթուր Մկրտումյանի կարծիքով` տեսահոլովակը հաջողվել է: Նա խորհուրդ տվեց երկրպագուներին սպասել «Հայարդի» հաջորդ տեսահոլովակներին:
Արթուր Մկրտումյանը Aravot.am-ի հետ զրույցում նշեց, որ խումբը տեսահոլովակով ցանկանում է ցույց տալ ատոմային ռումբի կործանարար ազդեցությունը.
«Երգի մեջ ասվում է, որ այդ ատոմային զենքը դեպի իրեն է քաշում և այդպիսով դրդում է մարդկանց վատ գործեր կատարելու: Տեսահոլովակը այնպես է նկարահանված, որ մարդիկ, տեսնելով այն, հրաժարվեն ատոմային զենքի օգտագործումից»:
«Հայարդ» խումբը ստեղծվել է 2010 թվականին հարվածահար Արթուր Մկրտումյանի և կիթառահար Անդրե Վարդանյանի կողմից, որոնց միացել են դաշնակահար Արմեն Սարգսյանը, վոկալիստ Սերգեյ Միրզախանյանը և բաս կիթառահար Դավիթ Խուրշուդյանը: Խումբը նվագում է պրոգրեսիվ հևի մետալ ժանրում:
Ամի ՉԻՉԱԿՅԱՆ
