Նոյեմբերի 1-ին Կոմիտասի անվան կամերային երաժշտության տանը տեղի ունեցավ Կարա-Մուրզայի հայկական առաջին բազմաձայն պատարագի և աշխարհիկ խմբերգների համաշխարհային շնորհանդեսը՝ Երևանի պետական կամերային երգչախմբի մասնակցությամբ:
Պատարագը նվիրվում էր 19-րդ դարի երգահան, խմբավար Քրիստափոր Կարա-Մուրզայի 160-ամյակին: Կարա-Մուրզան մշակել է ինչպես մի շարք ժողովրդական, այնպես էլ համաշխարհային երգեր: Նա նաև կազմավորել է առաջին հայկական քառաձայն երգչախումբը: Կարա-Մուրզայի պատարագը առաջին հայկական քառաձայն պատարագն է, որի ձեռագիրը տարիներ շարունակ համարվել է կորած: Պատարագը առաջին անգամ հնչել է 1887 թվականին Բաքվի սուրբ Գևորգ եկեղեցում, իսկ 1892 թվականին՝ Էջմիածնում, Թադևոս և Բարդուղիմեոս առաքյալների տոնի կապակցությամբ:
Պատարագի խմբագիր Գրիգոր Փիթեջյանը Aravot.am-ի հետ զրույցում խոստովանեց, որ բերկրանք է ապրում և վայելում է իր աշխատանքի արդյունքները. «Գիտեի՝ Քրիստափոր Կարա-Մուրզան մեր հայ երաժշտական մշակույթի մեծ դեմքերից է եղել, սակայն այժմ շատ քչերն են հիշում նրա անունը»:
Գրիգոր Փիթեջյանը նշեց, որ վստահ է եղել, որ Քրիստափոր Կարա-Մուրզան ավելի շատ ստեղծագործություններ է ունեցել, քան մինչև այդ հրապարակված 40 երգերը և երգչախմբային գործերը: 2007 թվականին պարոն Փիթեջյանը, ցանկանալով գիրք գրել Կարա-Մուրզայի մասին, Եղիշե Չարենցի տուն-թանգարանի պահոցում փնտրել է կորած գործերը և գտել է պատարագը և մի շարք աշխարհիկ երգեր: Սակայն ձեռագրում ներառել է միայն երգչախմբային հատվածները, որը և Գրիգոր Փիթեջյանը խմբագրել է՝ 17 էջից բաղկացած ձեռագիրը վերածելով 80 էջանոց գործի:
Կարդացեք նաև
Բազմաձայն պատարագի և աշխարհիկ խմբերգների գեղարվեստական ղեկավար և խմբավարն է Հարություն Թոփիկյանը, մենակատարներն են Սեյրան Ավագյանը, Թամարա Մոսինյանը, Վահագն Վարդազարյանը, Մաքրուհի Խաչատուրյանը և Արտակ Մելքոնյանը:
Ամի ՉԻՉԱԿՅԱՆ
Հիանալի է, որ կատարվեց հայկական առաջին բազմաձայն պատարագը: Լավ կլինի, որ կատարվի, նաև, հայկական առաջին և առայժմ միակ ,,Մագնիֆիկատ,,-ը, գրված` 1982թ. Հարգանքով` Մարիամ