«Կարծում եմ, որ ՀՀ-ի`Մաքսային միության անդամակցումը չի կարող լուրջ խոչընդոտ դառնալ, ուղղակի այն կդանդաղեցնի գործընթացը»,-Aravot.am-ի հարցին` արդյոք ՀՀ-ի` Մաքսային միության անդամակցումը կխոչընդոտի՞ Հայաստան-ԵՄ հարաբերություններին, այսպես պատասխանեց Եվրոպական երիտասարդական պառլամենտի շվեդ պատվիրակ Կատերինա Դուքան: Նա չի կարծում, թե իրավիճակը ճգնաժամային է: Մեր հստակեցմանը, թե ի՞նչը կդանդաղեցնի գործընթացը, շվեդ պատվիրակն այսպես արձագանքեց. «Պատճառը քաղաքական է: Դա հիմնականում կախված է նրանից, թե ՀՀ կառավարությունն ինչ որոշում կկայացնի կապված այն հարցի վերաբերյալ, թե որտեղ մնալ. շարունակել գտնվել ներկայիս չեզոք դիրքո՞ւմ, թե՞ ընտրել կողմերից մեկին: Սակայն իմ կարծիքով` Հայաստանը եվրոպական կողմնորոշում ունեցող երկիր է: Հատկապես երիտասարդները շատ դրականորեն են տրամադրված դեպի Եվրոպա»:
Եվրոպական երիտասարդական պառլամենտի` Լեհաստանը ներկայացնող պատվիրակ Պավել Վիլկոսը բացասաբար է տրամադրված ՀՀ-ի` Մաքսային միության անդամակցությանը: Նա կարծում է, որ դա կարող է լուրջ խոչընդոտների պատճառ դառնալ. «Կարծում եմ, որ դա մեծ խոչընդոտ է: Օրինակ հիմա եվրոպական պատվիրակները չգիտեն` որն է Հայաստանի հեռանկարը` արևե՞լք, թե՞ արևմուտք: Հայաստանը պետք է իր դիրքորոշումը հստակեցնի, քանի որ այն չի կարող խաղալ միաժամանակ երկու կողմերի հետ»: Մեր հարցին` օրինակ` ի՞նչ կփոխվի հարաբերություններում, ի՞նչը կարող է խոչընդոտել, որ ասենք հայ և եվրոպացի երիտասարդները շփվեն այնպես, ինչպես այժմ: Մեր զրուցակիցը պատասխանեց. «Ամեն ինչ կարող է փոխվել. օրինակ, եթե ՀՀ-ն կողմնորոշվի դեպի Եվրոպա, կլինի վիզայի ռեժիմի ազատականացում, և ես Լեհաստանից նույնիսկ առանց վիզայի կարող եմ գալ Հայաստան: Բայց Մաքսային միությանը անդամակցելու դեպքում դա անհնար կլինի, ու այդպես ամեն ինչ կփոխվի բոլոր ոլորտներում»:
Ի դեպ, նշենք, որ 2013թ. հունվարից ԵՄ անդամ երկրների քաղաքացիների համար Հայաստանը միակողմանիորեն առանց վիզայի ռեժիմի է անցել (խմբ.):
Կարդացեք նաև
Տաթև ՀԱՐՈՒԹՅՈՒՆՅԱՆ
