Նոյեմբերի 1-ին Սիրահարների այգում մեկնարկեց ամենամյա «Բացօթյա ընթերցանության փառատոնը»։ Այն իրականացվում է Հայաստանի երիտասարդական հիմնադրամի և «Ֆլեշմոբ Դիվիզիա» երիտասարդական ՀԿ-ի նախաձեռնությամբ և ՀՀ մշակույթի նախարարության աջակցությամբ:
Նոյեմբերի 1-3-ն անցկացվող «Բացօթյա ընթերցանության փառատոնի» նպատակն է միավորել երիտասարդությանը, ամրապնդել ընթերցելու մշակույթը և սերը գրքի հանդեպ:
«Բացօթյա ընթերցանության փառատոն» ծրագրի համակարգող Էդուարդ Լևանյանը նշեց. «Ծրագրի նպատակն է խրախուսել ընթերցանությունը, ապահովել երիտասարդների կապը գրքի հետ: Փառատոնից փառատոն մասնակիցների թիվն աճում է: Իսկ ՀԵՀ-ի հետ համագործակցությունն իր դրական ազդեցությունն է բերում փառատոնի աշխատանքներին, քանի որ ինչքան շատ կազմակերպությունների հետ համագործակցենք, այնքան ավելի մեծ կլինի փառատոնի դերն ու կարևորությունը»:
Այսօր Սիրահարների այգում երիտասարդները տեղադրում էին գրապահարաններ, այգու տարբեր այցելուներ ծանոթանում էին ցուցադրված գրականությանը: Վաղը` նոյեմբերի 2-ին, ժամը 14.00-ից կմեկնարկի գրքի բացօթյա ցուցահանդես, իսկ երեկոյան սպասվում են երիտասարդ կատարողների համերգ, մանկական ներկայացումներ:
Հայաստանի երիտասարդական հիմնադրամի
հասարակայնության հետ կապերի ծառայություն
