Մալաթիա-Սեբաստիա վարչական շրջանների ընդհանուր իրավասության դատարանի դատավոր Արտակ Զախարյանի նախագահությամբ շարունակվում է Արման Երիցյանի նկատմամբ հարուցված քրեական գործի դատաքննությունը:
Արման Երիցյանին մեղադրանք է առաջադրվել այն բանի համար, որ նա անցյալ տարվա նոյեմբերի 28-ին, ժամը 19.00-ի սահմաններում, «Մալաթիա»» գյուղմթերքների շուկայում, նախնական համաձայնության գալով ոմն Արսենի հետ, դանակի գործադրմամբ հարձակվել է Սամվել Մեժլումյանի վրա և տուժողից հափշտակել է 80 000 ՀՀ դրամ գումար:
Արման Երիցյանի պաշտպանությունը ստանձնել է ՀՀ փաստաբանների պալատի անդամ, հանրային պաշտպանի գրասենյակի փաստաբան Սերգեյ Մկրտչյանը:
Պաշտպանը տեղեկացնում է, որ իր պաշտպանյալն ինչպես նախաքննության, այնպես էլ դատական քննության ժամանակ իրեն մեղավոր չի ճանաչել:
Կարդացեք նաև
Մինչ գործը դատարան ուղարկվելը՝ Ս.Մկրտչյանը դիմել էր ոստիկանության Մալաթիայի քննչական բաժնի ավագ քննիչ Ա.Նավոյանին՝ իր պաշտպանյալի մեղսունակության հարցը պարզելու համար:
1999թ.-ին կատարել է ավտոմեքենայի գողության դեպք, ենթարկվել է ծեծի, ստացել է գլխուղեղի ցնցում, սալջարդ, վերքեր, կոտրվածք, հոսպիտալացվել է ծանր վիճակում «Արմենիա» բուժկենտրոն: Ըստ բժշկական հանձնաժողովի 2004թ.տեղեկանքի էլ, նրա հուզական ռեակցիաները արտահայտիչ են, հակված է աֆեկտիվ բուռն լիցքաթափումնների. «Հետաքրքրությունների շրջանակը նեղ է, վարքը կոնֆլիկտային, ագրեսիվ, սեթեւեթ»:
Նա ազատվել է բանակում ծառայելուց:
Պաշտպան Սերգեյ Մկրտչյանը միջնորդել էր նշանակել դատահոգեբանական, դատահոգեբուժական համալիր փորձաքննություն, որի կատարումը հանձնարարվել էր ՀՀ ԱՆ ենթակայությամբ գործող միջգերատեսչական դատահոգեբուժական ստացիոնար փորձաքննությունների հանձնաժողովին:Սակայն դատական գործընթացը սկսվել է, իսկ այդ միջնորդությունը չի բավարարվել:
Ըստ պաշտպանի, տուժողը հակասական ցուցմունքներ է տվել դեպքի հետ կապված հանգամանքների, իրենից հափշտակված գումարի, իր մարմնի վրա առկա վնասվածքների առաջացման, ժամանակի մասին:
Ըստ վկաներից մեկի՝ Ն.Դ-ի, տուժողը դեպքի օրը երեկոյան եկել է «Մալաթիայի» տաղավար՝ օղի խմելու: Եկել է մենակ, նրա քթին եւ գլխին արդեն իսկ առկա են եղել «թարմ, արյունոտ վնասվածքներ»:
Վկայի հարցին, թե ինչ է եղել, տուժողն ասել է, թե սայթաքել է, ընկել է:
Տուժողը սկսել է դարձյալ օղի խմել, այդ պահին, ըստ այս վկայի, եկել է Ա.Երիցյանը:
«Այս հանգամանքը նույնպես հերքում է եւ բացառում վերջինիս մասնակցությունը տուժողի նկատմամբ բռնություն գործադրելուն»,-ասում է Ս.Մկրտչյանը:
Ի դեպ, տուժողի վնասվածքները ստուգելու նպատակով չի նշանակվել դատաբժշկական փորձաքննություն:
Պաշտպանը դատահոգեբուժական փորձաքննություն է պահանջում տուժողի համար էլ: Պաշտպանը հանցակազմի բացակայության հիմքով միջնորդում է կարճել այս գործի վարույթը, դադարեցնել իր պաշտպանյալի նկատմամբ քրեական հետապնդումը:
Հաջորդ դատական նիստը նշանակվել է նոյեմբերի 5-ին:
Ռուզան ՄԻՆԱՍՅԱՆ
