Համաձայն ֆրանսերենի և ֆրանկոֆոնիայի տարածման իր կանոնադրական առաքելությանը` Սենգորի անվան ֆրանկոֆոնիայի հայաստանյան ամբիոնն այսօր Հայաստանում Ֆրանսիական համալսարանում (ՀՖՀՀ) հրավիրել է Սենգորի անվան ֆրանկոֆոնիայի ամբիոնների միջազգային ցանցի տարեկան ժողովը:
Սենգորի անվան ֆրանկոֆոնիայի 14 ամբիոնները գործում են աշխարհի 5 մայրցամաքներում և նպատակ ունեն խթանելու ֆրանկոֆոնիայի զարգացումը բազմալեզվության համատեքստում:
Հայաստանում Ֆրանսիական համալսարանի ռեկտոր Ժան-Ժակ Մոնտուան տարեկան ժողովի կայացումը մեր երկրում խորհրդանշական համարեց` հաշվի առնելով այն հանգամանքը, որ 2012 թվականին Հայաստանը դարձավ Ֆրանկոֆոնիայի միջազգային կազմակերպության լիիրավ անդամ: «Այն կարևորվում է նաև Հայաստանում բազմալեզվության և միջազգային ինտեգրման զարգացման համատեքստում»,- հավելեց Ժան-Ժակ Մոնտուան:
Հայաստանում Ֆրանսիայի դեսպան Անրի Ռենոն իր խոսքում կարևորեց ՀՀ արտաքին գործերի նախարար Էդվարդ Նալբանդյանի դերը` Հայաստանում ֆրանկոֆոնիայի զարգացման գործում: Նա նաև ընդգծեց, որ Հայաստանում Ֆրանսիական համալսարանն այն կարևորագույն և գլխավոր օղակն է, որը խթանում է ֆրանկոֆոնիայի զարգացումը: «Կարևոր է, որ ֆրանսերենն այսօր լինի ոչ միայն մշակույթի ու գրականության, այլև բիզնեսի լեզու»,- ասաց դեսպանը:
Նշենք, որ ժողովին մասնակցում են պատվիրակներ Եգիպտոսից, Լիբանանից, Վիետնամից, Ֆրանսիայից, Ռումինիայից, Իտալիայից, Բուլղարիայից, Չինաստանից, Սենեգալից, Կանադայից, Կամերունից, Բուրկինա Ֆասոյից և այլ երկրներից:
Սիրանուշ ՀԱՅՐԱՊԵՏՅԱՆ
