Այսօր փոխոստիկանապետ Արթուր Օսիկյանի եւ ԵԱՀԿ երեւանյան գրասենյակի ղեկավար Անդրեյ Սորոկինի մասնակցությամբ ներկայացվեց «Ոստիկանությունում կոռուպցիայի դեմ պայքարը, բարեվարքության եւ հաշվետվողականության ամրապնդումը» ձեռնարկի հայերեն տարբերակը: Այն նաեւ ուղեցույց է լինելու Հայաստանի ոստիկանության համար՝ արդյունավետ բարեփոխումներ անելու համակարգում:
«Կոռուպցիան բարդ երեւույթ է, եւ շատ կարեւոր է դրա դեմ պայքարել տարբեր մակարդակներում եւ բոլոր հաստատություններում, այդ թվում՝ ոստիկանությունում»,- ասաց պարոն Սորոկինը: Նրա համոզմամբ, թե՛ ոստիկանությունում ռազմավարություն մշակողների, թե՛ գործնական աշխատանք իրականացնողների համար այդ ձեռնարկը կդառնա օգտակար գործիք՝ կոռուպցիային հակազդելու եւ հակակոռուպցիոն գործելակերպը ներդնելու համար:
Փոխոստիկանապետն էլ բացատրեց, թե այդ ձեռնարկն ինչպես են օգտագործելու համակարգում: «Հազարավոր գրքեր են լույս տեսել, եթե կարողանանք էդ հազարավոր գրքերից թեկուզ ինչ-որ բան էլ վերցնել եւ տեղայնացնել մեր օրենսդրության մեջ, մեր աշխատանքում, կարծում եմ՝ օգտակար կլինի: Չենք զլանում էդ հազարավոր գրքերից օգտվել, դիտարկել եւ փորձել ներդնել: Այս ձեռնարկը համակցությունն է տարբեր երկրների ոստիկանական համակարգերի կատարելագործման»,-ասաց նա:
Պարոն Օսիկյանը նաեւ վստահեցրեց ԵԱՀԿ ներկայացուցիչներին, որ ՀՀ ոստիկանությունում կատարված բարեփոխումների արդյունքում էական փոփոխություններ են կատարվել, եւ հասարակությունն արդեն այլ կերպ է ընկալում ոստիկանին:
Aravot.am-ը հետաքրքրվեց ի՞նչ փոփոխությունների մասին է խոսքը եւ հիշեցրեց, որ դեռ նախորդ ամիս մարդու իրավունքների պաշտպան Կարեն Անդրեասյանը դատապարտել էր ոստիկանների գործողությունները, ակտիվիստների հետ ոստիկանական բախումներն ու բռնություն կիրառելու դեպքերը:
Կարդացեք նաև
«Ցանկացած իրավիճակում հնարավոր են ե՛ւ մարդու իրավունքների պաշտպանի կողմից դիտարկումներ, ե՛ւ առանձին քաղաքացիների կողմից դիտարկումներ, եւ հնարավոր են այս կամ այն իրավիճակում ոստիկանության ոչ իրավաչափ վարքագծի դրսեւորումներ, բայց մեր խնդիրն է նման դեպքերը շատ արագ վերհանել, եւ այն անձանց, որոնք չեն գործում օրենքի սահմաններում, պատժել: Մեզ մոտ ստեղծվեց կարգապահական հանձնաժողով , հուսով եմ՝ սա մեկ քայլ առաջ էր ժողովրդավարական ոստիկանություն ունենալու»:
Մեր դիտարկմանը, թե ոստիկանությանը քննադատում են, որ բարեփոխումների արդյունքում միայն ոստիկանների համազգեստը փոխվեց, պարոն Օսիկյանն ասաց. «Համազգեստի փոխվելուն զուգահեռ փոխվել է շատ բան, պարզապես պետք է կույր չլինել, որ տեսնել»:
Արփինե ՍԻՄՈՆՅԱՆ
