«Շնորհակալություն դասախոսության համար, դուք, որպես ձվադրման մասնագետ, ունեցաք այստեղ: Այն շատ ուսուցանելի էր»,- այսօր խորհրդարանում 2014թ. պետական բյուջեի նախագծի քննարկումների ժամանակ դիմելով ՀՀ բնապահպանության նախարար Արամ Հարությունյանին`ասաց ՀԱԿ պատգամավոր Լեւոն Զուրաբյանը: Պատասխանելով պատգամավորի`գետերի վրա բազմաթիվ ՀԷԿ-երի կառուցման պարագայում ձկնարդյունաբերության ճակատագրին վերաբերվող հարցին, նախարարը շատ երկար եւ մանրամասն բացատրում էր ձվադրման գործընթացի մանրամասները եւ արդյունքները:
Զուրաբյանի դիտարկումն առաջացրեց պատգամավորների ծիծաղը: Արամ Հարությունյանն էլ արժանապատվորեն ընդունեց հումորը եւ ինքն էլ ժպտաց:
Բուն ՀԷԿ-երի մասով նախարարն ասաց. «Այո մենք ունենք այդպիսի անհանգստություն և համապատասախան հանձնաժողովում հանդես ենք եկել օրենսդրական նախաձեռնությամբ, որպեսզի Սևանում ընդհանրապես արգելենք փոքր ՀԷԿ-երի թույլատրումը, իսկ Սևանից հեռու գետերի դեպքում, եթե չի վնասում, բնականաբար կարելի է նաև օգտագործել փոքր ՀԷԿ-երի գործունեությունը»։
Այնուհետև նախարարն անցավ ձվադրման պրոցեսի բացատրությանը և պատգամավորին հուշեց, թե ձվադրման ժամանակ մայր ձկները մոտենում են ոչ թե գետերում, այլ գետաբերանների ակունքներին են իրականացնում ձվադրում, և իրենք դա հաշվի առնելով հենց այդ գետաբերանների տարածքում են մանրաձուկը բաց թողնում, որպեսզի հնարավոր բնական միջավայր ապահովեն։ «Այո մանրաձկան բացթողնումը արդյունավետ է, ինչը ցուցանիշերով է երևում»,- հարցն ամփոփեց նախարարը:
Ինչ վերաբերվում է մաքրման հետ կապված խնդրին, նա նկատեց, որ իրենք դեռևս նախորդ տարիներին պատգամավորների այցելություն են կազմակերպել և ոչ միայն թվերով, այլ նաև այցով փորձել ներկայացնել իրավիճակը։ «Եթե դուք գնաք, ես կխնդրեմ ասենք Հայրիվանքի տարածքից մի քանի կմ նայել, թե ինչ էր և ինչքանով է մաքրված։ Իհարկե, դժվարություն կան, մասնավորապես ջրի մեջ, մենք հատուկ սարքավորումներ ենք բերել ջրի մեջ աշխատող, եթե դաշտայինով պատկերացնենք, բավականին բարդ է, բայց իրականանալի»,-ասաց Արամ հարությունյանը`հավելելով, որ 1700 և ավելի հա տարածք մաքրվել է, 500-550 հա դեռ ունեն մաքրելու։ Ըստ նրա, արդյունքը ակնհայտ դրական է, քանի որ օրինակ՝ ջրի թափանցիկությունը 2, 5 մետրից դարձել է 7 մետրի։
Կարդացեք նաև
Այս երկարաշունչ, մասնագիտական եւ ամենայն մանրամասնությամբ տրված պատասխանը, միեւնույն է, չբավարարեց ՀԱԿ պատգամավորին։
Նելլի ԳՐԻԳՈՐՅԱՆ
