Հոգեբանի դիտարկմամբ, անհանդուրժողականությունը հանգեցնում է նաեւ ֆիզիկական ագրեսիայի, այդ թվում` սպանության
ՀՀ ոստիկանության տվյալների համաձայն` այս տարվա 9 ամիսների ընթացքում հանրապետությունում գրանցված հանցագործությունների ընդհանուր թվաքանակը աճել է 15,0%-ով կամ 1761 դեպքով:
Եթե նախորդ տարվա 9 ամիսների ընթացքում գրանցվել է 11 713 դեպք, ապա այս տարի արդեն այդ թիվը հասել է 13 474-ի:
Լոռիում եւս գրանցված հանցագործությունների աճ է նկատվում:
Կարդացեք նաև
Համաձայն ոստիկանության տվյալների` նախորդ տարվա 919-ի փոխարեն 2013 թ. հունվար-սեպտեմբեր ամիսներին Լոռու մարզում 973 հանցագործություն է գրանցվել: Լոռիում գրանցված սպանությունների դեպքերը եւս կրկնակի ավելացել են՝ 2-ից դառնալով 4:
Հանցագործությունների, մասնավորապես սպանությունների ավելացման դեպքերը «Վանաձորի հոգեբանական վերականգնողական կենտրոն» հ/կ նախագահ, հոգեբան Արծվի Հարությունյանի կարծիքով՝ կապված է մարդու անպաշտպանության հետ:
Ըստ նրա` սպանությունը ընդամենը նախանշան է, այն ցույց է տալիս, որ երկրում ամեն մարդ իր տեղում չէ:
«Այն ցույց է տալիս, որ դաստիարակությունը դաստիարակության նման չէ, որ մարդը վաղվա օրվա հանդեպ վստահություն չունի, որ անպատժելիության մթնոլորտ կա, որովհետեւ չկա այնպիսի մթնոլորտ, որ մարդիկ մտածեն` իրենց արածի համար համարժեք պատասխան կտան, որ փողով չեն ազատվի: Այժմ բարձիթողի է, ամեն ինչ առուծախի է վերածվել, կայուն արժեքային համակարգ չկա: Այս ամենը պետք է համակարգային փոփոխության ենթարկել»,-«Առավոտի» հետ զրույցում ասում է հոգեբանը:
Սպանություն կատարելու հոգեբանական մյուս պատճառը, Արծվի Հարությունյանի գնահատմամբ, հիասթափությունն է, հուզական լարվածությունը, տագնապայնությունը:
Նա նկատում է, որ հիասթափությունները կապված են հանդուրժողականության հետ:
«Ֆրուստրացիաները կապված են հանդուրժողականության հետ, այսինքն` ինչքանով է մարդը ուրիշի կարծիքը կամ ուրիշի անձը հարգում որպես այդպիսին: Եթե մենք ընդհանուր հայտարարի չենք գալիս, գոնե կարող ենք հարգել դիմացինի կարծիքը: Բայց գողականը, հարուստը կամ այլ հանցագործ տարրեր, որ եսակենտրոն են, սովոր են բոլորին իրենց հարմարեցնել, ոչ թե իրենք հարմարվեն, անհանդուրժող են, իսկ անհանդուրժողականությունը հանգեցնում է նաեւ ֆիզիկական ագրեսիայի, այդ թվում` սպանության»,- նշում է հոգեբանը՝ հավելելով, որ հոգեպես առողջ մարդը սպանության պահին շատ լավ էլ գիտակցում է, որ հնարավոր է մարդուն մահ պատճառի:
«Հոգեպես առողջ մարդն ամեն քայլի համար էլ կարող է իրեն հաշիվ տալ, սպանություն կատարելիս` նույնպես»,- եզրափակում է Արծվի Հարությունյանը:
ԱՆՈՒՇ ԲՈՒԼՂԱԴԱՐՅԱՆ
Վանաձոր
«Առավոտ» օրաթերթ
