Այսօր «Տեսակետ» ակումբում, խոսելով տարածաշրջանային զարգացումների` Վրաստանի նախագահական ընտրությունների մասին, քաղաքագետ Ալեքսանդր Իսկանդարյանը կարծիք հայտնեց, թե այդ նախագահական ընտրություններից հետո քրեական գործեր կհարուցվեն. «Վրաց ժողովուրդը նախկին իշխանություններին պատժված տեսնելու մեծ ցանկություն ունի»,- ասաց Ալեքսանդր Իսկանդարյանը:
Անդրադառնալով «Վրացական երազանք» կուսակցության հաղթած թեկնածու Գեորգի Մարգվելաշվիլիին, Ալեքսանդր Իսկանդարյանը նշեց, որ վերջինի հաղթանակը պայմանավորված էր Իվանիշվիլիի ու նրա ղեկավարած քաղաքական ուժի խարիզմայով:
Ալեքսանդր Իսկանդարյանը, վերլուծելով Վրաստանի ընտրությունները, նշեց, որ Վրաստանը այս ընտրություններից հետո էլ կշարունակի մնալ իբրեւ արեւմտամետ երկիր, իսկ հարեւանների հետ կսկսի լավացնել իր հարաբերությունները:
Ալեքսանդր Իսկանդարյանը գտնում է, որ Վրաստանի նախկին նախագահ Միխեիլ Սաակաշվիլիի նախագահության ժամանակ երկրի արտաքին քաղաքականությունը որոշվում էր ոչ թե Թբիլիսիում, այլ Վաշինգտոնում, սակայն այժմ`«Վրաստանը հնարավորություն կունենա մշակել ինքնուրույն արտաքին քաղաքական կուրս: Բացի այդ` նոր հեռանկարներ են բացվում Հայաստան-Վրաստան-Ռուսաստան շղթայի համատեքստում, ինչպես նաեւ հայ-վրացական հարաբերությունների սերտացման ուղղությամբ»:
Եվա ՀԱԿՈԲՅԱՆ
Կարդացեք նաև
