«Ինձ հետ ամեն ինչ նորմալ է, իմ որդու հետ կապված առավել եւս ամեն ինչ նորմալ է»,- այսօր խորհրդարանում լրագրողների հետ ճեպազրույցում ասաց ՀՀ սպորտի և երիտասարդության հարցերի նախարար Յուրի Վարդանյանը: Հիշեցնենք, որ ՀՀ սպորտի եւ երիտասարդության հարցերի նախարար Յուրի Վարդանյանի ավագ որդուն՝ 29-ամյա Դավիթ Վարդանյանին, օրեր առաջ ձերբակալել են Իրան-Հայաստան սահմանին:
Սահմանակետով թմրանյութ անցկացնելիս նրան ձերբակալել են, ապա՝ կալանավորել եւ ուղարկել Երեւան՝ քննչական մեկուսարան: Դեպքի առթիվ հարուցվել է քրեական գործ ՔՕ-ի 268-րդ հոդվածի հատկանիշներով: Այդ հոդվածը նախատեսված է հետեւյալ հանցագործության համար՝ թմրամիջոցների կամ հոգեմետ նյութերի ապօրինի շրջանառությունն՝ առանց իրացնելու նպատակի:
Նախարարը նշեց, որ որեւէ բան չի եղել, և ինքը բացարձակապես անհանգստանալու խնդիր չունի։ Հարցին՝ պատրաստվո՞ւմ եք հրաժարական տալ, Յուրի Վարդանյանը պատասխանեց․ «Է՜, լավ էլի, այդպիսի բան չկա»։
Սպորտի նախարարը խուսափում էր պատասխանել լրագրողների հարցերին, ովքեր էլ ստիպված վազում էին նրա հետևից, թեեւ ասաց, որ պատրաստ է այդ թեմայով հանդիպել ու խոսել լրագրողների հետ: Դիտարկմանը, թե չեք ստեղծում այդ առիթը, նախարարն ասաց․«Թողո՞ւմ են, որ ստեղծենք, մի օր էս կողմ են կանչում, մի օր էն կողմ են կանչում»։
Նելլի ԳՐԻԳՈՐՅԱՆ
