«Վանաձորի հոգեբանական վերականգնողական կենտրոն» ՀԿ նախագահ, հոգեբան Արծվի Հարությունյանի կարծիքով այն անձինք, ովքեր սպանություն են կատարել, իրականում շատ տագնապային, լարված, խոցելի մարդիկ են:
«Մարդասպանները շատ տագնապային, լարված, խոցելի մարդիկ են»,-Aravot.am-ի հետ զրույցում ասաց նա:
Ըստ նրա, եթե օրինակ, գողերը գողություն անելուց առաջ ու հետո իրենց հանգիստ են զգում, ապա նույնը չենք կարող ասել մարդ սպանած անձերի մասին:
«Գողերը ամենախաղաղն են, ամենահանգիստն են, այսինքն` նրանք ավելի շատ կապերի, հարաբերությունների մեջ են, ավելի ներգրավված են սոցիումի մեջ. նրանք գողություն անելուց առաջ ու հետո իրենց զգում են հանգիստ, իսկ մարդասպանները շատ տագնապային, լարված մարդիկ են, խոցելի են, բնականաբար նրանք փորձելու են այդ սպանությունով կամ նման հանցագործությունով թեթեւանալ, հանգստանալ»,-ասում է Արծվի Հարությունյանը:
Ըստ հոգեբանի` հանցագործների ընտանիքներում 4-5 անգամ մեծ է ռիսկը հանցագործ դառնալու համար:
«Ամեն մարդ կարող է պոտենցիալ մարդասպան լինել, բայց գործնականում` ոչ: Այն մարդիկ, ովքեր հանցագործներ են, նրանց տանը մոտավորապես 4-5 անգամ մեծ է ռիսկի գործոնը հանցագործ դառնալու»,-եզրափակում է հոգեբանը:
Անուշ ԲՈՒԼՂԱԴԱՐՅԱՆ
