Կրթական տեխնոլոգիաների ազգային կենտրոնը (ԿՏԱԿ) ամեն տարի հավաքում է հանրակթության ոլորտի վիճակագրությունը, փոխանցում վիճակագրական պետական ծառայությանը , նաեւ հրապարակում է «Կրթությունը Հայաստանում» ամենամյա տեղեկագիրը:
Ինչպես Aravot.am-ի հետ զրույցում հայտնեց ԿՏԱԿ-ի տնօրեն Արտակ Պողոսյանը, այս տարի իրենց աշխատակիցներից մեկը առաջարկել է ունենալ վիճակագրության համար առանձին կայք: Եվ այն ստեղծվել է՝ stat.armedu.am:
«Կայքը հնարավորություն կտա ավելի մատչելի դարձնել տեղեկատվությունը հասարակության համար: Ցանկացած մարդ կարող է այցելել կայք ու ստանալ ամբողջական տեղեկատվություն կրթության վիճակագրության վերաբերյալ եւ վերլուծություն կատարել: Ընդ որում, խոսքը վերաբերում է ինչպես այս ուսումնական տարվան, այնպես էլ նախորդ տարիներին: Պարզ է, որ տեղեկագրերով դա ավելի դժվար կլիներ կատարել: Մի խոսքով, մեր խնդիրն էր հանրակրթության ոլորտի վերաբերյալ տեղեկատվությունը ավելի մատչելի դարձնել հասարակությանը եւ ավելի թափանցիկ աշխատաոճ որդեգրել: Կարծում եմ՝ կայքը հաջողվել է ու շատ օգուտ կտա կրթության ոլորտում հետազոտություններ, վերլուծություններ անող ցանկացած անձի»,- ասաց Արտակ Պողոսյանը:
«Հանրակրթությունը Հայաստանում – վիճակագրական տեղեկատու» կայքում ներկայացված են Հայաստանի հանրակրթական ուսումնական հաստատությունների գործունեությունը բնութագրող վիճակագրական ցուցանիշներ: Տեղեկատուն կազմվել է «Հանրակրթական ուսումնական հաստատությունների գործունեության մասին» վարչական վիճակագրական հաշվետվության տվյալների հիման վրա, որոնք լրացրել են Հայաստանի հանրակրթական ծրագրեր իրականացնող ուսումնական հաստատությունները: Տեղեկատուում տեղ են գտել նաև ՀՀ պետական ուսումնական հաստատություններում Էլեկտրոնային կրթական նյութերի գծով կարիքների գնահատման և տեղեկատվական հաղորդակցական տեխնոլոգիաների ներդրման և օգտագործման հետազոտության արդյունքները:
Կարդացեք նաև
Գոհար ՀԱԿՈԲՅԱՆ
