ԵԱՀԿ աջակցությամբ Նուբարաշենի թունաքիմիկատների գերեզմանոցի տարածքի գնահատման եւ վերականգնման աշխատանքները այսօր Արտակարգ իրավիճակների նախարարն ու ու ԵԱՀԿ երեւանյան գրասենյակի ղեկավար Անդրեյ Սորոկինը ներկայացրին շահագրգիռ հ/կ-ների ղեկավարներին:
ԱԻ նախարար Արմեն Երիցյանն ասաց, որ առաջին անգամ 2010թ.-ին՝ նախարար նշանակվելիս, այցելեց Նուբարաշեն.«Արձանագրեցինք, որ պետք է անպայման միջոցներ ձեռնարկել: Մեզ աջակցեց ԱՄՆ-ի կառավարությունը և ուսումնասիրության համար հատկացրեց գումար: Ծրագրի առաջին փուլը՝ ուսումնասիրությունը, արդեն արված է, երկրոդ փուլը կլինի այն, թե ինչ պետք է անենք այդ թունաքիմիկատների հետ»:
Թե ի՞նչ ժամկետներում կարվի այդ աշխատանքը, նախարարը պատասխանեց. «Այնտեղ նաև վարակվել է հողը, պետք է 32 տեսակի թունաքիմիկատներ համապատասխան առանձին տարաների մեջ տեղադրել: Կան քիմիկատներ, որոնք չի կարելի այրել, ժամկետը դեռ չգիտեմ: Հայաստանից տեղափոխել թունաքիմիկատները չի լինի, քանի որ ոչ մի երկիր չի համաձայնի, պետք է տեղում աշխատանքները արվեն: Տեղանքը, իհարկե, անվտանգ չէ, այնտեղ միջազգային փորձագետներն են ուսումնասիրություն արել, և այնպիսի վտանգ չկա, որ այսօր ասենք՝ դա վտանգավոր գոտի է, գումարների մասին ստույգ չեմ կարող ասել, թե ինչքան կպահանջվի»:
ԵԱՀԿ երեւանյան գրասենյակի ղեկավար Անդրեյ Սորոկինն էլ ասաց, որ այդ ծրագրի շրջանակներում հավաքագրվել են մանրամասն տվյալներ Նուբարաշենի գերեզմանոցի թունավոր թափոնների սահմանների, ծավալի եւ բաղադրության մասին.«Ինչը թույլ է տվել ճշգրիտ գնահատական տալ շրջակա միջավայրին սպառնացող վնասների ռիսկայնության մակարդակի վերաբերյալ»:
Կարդացեք նաև
Ծրագրի ղեկավար Բոուդվին Ֆոկկեն էլ ներկայացրեց թունաքիմիկատների գերեզմանոցի տարածքում իրենց կատարած աշխատանքների արդյունքները: Նրա ներկայացմամբ, գերեզմանոցի տարածքի հողի վերին շերտը խիստ ախտահարված է, դրա հաջորդ շերտն ավելի քիչ է ախտահարված, ստորգետնյա ջրերն ախտահարված չեն, քանի դրանք այնքան խորն են, որ պաշտպանված են:
Նրա խոսքով, նաեւ առողջությանը սպառնացող ռիսկերն են դիտարկվել.«Տարածքը նպատակահարմար չէ գյուղատնտեսական նշանակության օգտագործման համար, ոչ միայն պետք է փակել տարածքը, այլ նաև սահմանել փակ ռեժիմ, և թույլ չտալ, որ կենդանիներն արածեն»:
Նրա համար, հիմնական բացահայտումը ստորգետնյա ջրերի ախտահարված չլինելն էր:
ԱԻՆ ներկայացուցիչներից մեկն էլ հետաքրքրվեց սողանքի վիճակով, հարցրեց սողանքային գործընթացը տարածքում գնահատվե՞լ է:
Ի պատասխան, պարոն Ֆոկկեն վստահեցրեց, որ բուն գերեզմանոցը ամենատրամաբանական տեղում է, չնայած շաժվում է. «Սողանքը կնվազի մեծապես, եթե ջուրը հեռացվի: Ամբողջ գերեզմանոցը էրոզիայի է ենթարկվում ջրից, եթե ջուրը հանվի, ավելի նվազ կլինեն նման երեւույթները»:
Արփինե ՍԻՄՈՆՅԱՆ
