Այսօր «Հայելի» ակումբում պատգամավոր Մկրտիչ Մինասյանը, խոսելով
գործազրկության նպաստի վերացման, աշխատավարձերի բարձրացման մասին, ասաց. «ՀՀ-ում աշխատավարձերի կարգավորումը պետք է վաղուց արվեր, ուրիշ բան է բարձրացում կդնենք անունը, թե համակարգային մոտեցում, բայց ես կհամարեմ դա համակարգային մոտեցում, որովհետեւ ընդհանուր տրամաբանություն պետք է լինի: ԱԺ-ում ես կենսաթոշակների հետ կապված էլ այս հարցը բարձրացրեցի, որ անհրաժեշտ է համակարգային մոտեցում ցուցաբերել: Հուսով եմ` այս առումով էլ կկարգավորվի հարցը»:
Ինչ վերաբերվում է գործազրկության նպաստների վերացմանը, ապա, ըստ Մկրտիչ Մինասյանի` «Այդ 18 հազարի մասին կասեմ, որ պետք է ամեն ինչ անել, որպեսզի մարդիկ աշխատեն: Ես, իհարկե, այն կարծիքին չեմ, որ այդ 18 հազարով կարելի էր ապրել: Այս քայլը մարդկանց շահագրգռելու համար է արվել, որ աշխատեն, եւ ոչ թե գրանցվեն նպաստառուների ցուցակում ու սպասեն այդ գումարին»:
Մկրտիչ Մինասյանի խոսքով`այդ գումարների բաշխման հետ կապված թերություններ կան, քանի որ ստացվում է այսքան ժամանակ անիմաստ գումարներ են վատնվել, բայց թե ով պատասխան կտա այդ ամենի համար, ինքն այս հարցին չի կարող պատասխանել. «Ամենայն հավանականությամբ, եթե երկրի քաղաքական իշխանությունը քայլ է ձեռնարկում, ուրեմն դա վերլուծությունների կարիք ունի եւ դրանից ելնելով էլ այդ քայլին են գնացել»,- ավելացրեց Մկրտիչ Մինասյանը:
Եվա ՀԱԿՈԲՅԱՆ
