«Հարցը մեր կառավարության վարչապետի մտածողության մեջ է: Մեր ղեկավարությունը չի զգում պատասխանատվություն` սոցիալական ծանր վիճակի, գործազրկության համար, հակառակ դեպքում վարչապետը ելույթ չէր ունենա՝ ասելով, թե նրանք չեն փնտրում աշխատանք, ծույլ են…»,- այսօր «Հայելի» ակումբում ասաց հրապարակախոս, սոցապ նախկին փոխնախարար Կարինե Հակոբյանը, խոսելով գործազրկության նպաստի վերացման մասին:
Կարինե Հակոբյանի խոսքով`սխալ կառավարման արդյունքում է, որ գործազրկությունն այս աստիճանի է հասել: Ըստ նրա`պետք է աշխատանքի եւ աշխատավարձի համակարգը փոխվի, բայց` «Մեզ մոտ դա դարձյալ հակառակ ուղղությամբ է տեղի ունենում, որովհետեւ այդ փոփոխությունը պետք է թեթեւացի սոցիալական բեռը:
Այսօր գիտնականը ստանում է հարյուր հազար դրամ, իսկ «Գազպրոմի» տնօրենը, որը ոչինչ չի ստեղծում, ստանում է շատ անգամ ավելի: Գործազրկության նպաստը ոչ թե պետք է կրճատվեր, այլ բարձրացվեր, որովհետեւ դա պետության մեղքն է:
Գուցե վարչապետը չի հասկանում այդ 18 հազար դրամի արժեքը, որովհետեւ դա ընդամենը մեկ նախաճաշի գին է…»:
Եվա ՀԱԿՈԲՅԱՆ
