«Եկող տարի Ձեր աշխատավարձը կտրուկ բարձրանալու է, ի՞նչ այլ միջոցառումներ պետք է իրականացնեք, ի՞նչ ջանքեր պիտի գործադրեք, որ այսօր չեք կարողանում անել`այս աշխատավարձի շրջանակներում»: Այս հարցն այսօր խորհրդարանում, մշտական հանձնաժողովներում 2014 թ. պետական բյուջեի նախագծի քննարկումների ժամանակ նախագահի աշխատակազմի ղեկավար Վիգեն Սարգսյանին ուղղեց «Ժառանգություն» խմբակցության ղեկավար Զարուհի Փոստանջյանը`կառավարման ապարատի պահպանման ծախսերի ներկայացման ժամանակ:
Տիկին Փոստանջյանը նկատի ուներ կառավարության ներկայացրած եւ անցած քառօրյայում բուռն քննարկումների արժանացած բարձրաստիճան պաշտոնյաների աշխատավարձերի բարձրացման միասնական սանդղակի մասին նախագիծը, որը հուլիսի 1-ից նախատեսում է բարձրաստիճան պաշտոնյաների աշխատավարձերի կտրուկ աճ:
Ի դեպ, եկող տարվա բյուջեով նախատեսված է, որ կառավարման ապարատի պահպանման ծախսերի համար 10,4 միլիարդ դրամ ավելի կտրամադրվի, որից 9 միլիարդն՝ աշխատավարձերի ֆոնդին:
«Ձեր ջանքերի արդյունքում կտրվի՞ Ժիրայր Սեֆիլյանին քաղաքացիություն, ով գնդապետ է, քսան տարի ապրում է Հայաստանում, բայց քաղաքացիություն չունի»,-շարունակեց Փոստանջյանը :
Վիգեն Սարգսյանն ասաց, որ որեւէ անձին քաղաքացիություն շնորհելու հարցը չի մտնում բյուջեի ծավալների մեջ, որ դա Սահմանադրական լիազորություն է, որը բացատրություն չի նախատեսում. դա բացարձակ իրավունք է, ու ինքը հանգիստ կարող էր շրջանցել հարցը: Բայց, այնուամենայնիվ, նկատեց, որ մերժում ստանալուց հետո Սեֆիլյանը չի վերադիմել`պատմելով հայտնի հումորը, որ «լատարեում հաղթելու համար պետք է գոնե տոմսն առնել»:
Ինչ մնում է իր աշխատավարձին վերաբերվող հարցին՝ Վիգեն Սարգսյանն ասաց. «Ես չեմ որոշում իմ աշխատավարձը, ԱԺ-ն է որոշում` կառավարության ներկայացրած սանդղակով»: Նա նկատեց, որ այդ ավելացումից իր լիազորությունները չեն ավելանալու, բայց օրենքն այն տեսքով, ինչպես որ բերվել է խորհրդարան, չի վերաբերվում միայն իր աշխատավարձին, վերաբերվում է 230 հազարից ավելի քաղաքացիների աշխատավարձերի բարձրացմանը: Ընդհանրապես, Փոստանջյանի մոտեցումից Վիգեն Սարգսյանը տարակուսեց`ասելով, որ ինքը չգիտե, թե ո՞ր աշխատավարձն ընդհանրապես կարող է կոմպենսացնել ընտանիքին օրերով, ժամերով չտեսնելը: Իսկ նման աշխատողներ, ըստ Սարգսյանի, Հայաստանում շատ կան: Բայց այն, որ Հայաստանում աշխատավարձերի բարձրացումը պետք է շարունակական լինի, Վիգեն Սարգսյանն այլընտրանք չի տեսնում:
Նելլի ԳՐԻԳՈՐՅԱՆ
