Հոկտեմբերի 28-ին «Նուռ» երիտասարդ ստեղծագործողների առաջին համահայկական երիտասարդական մրցույթի ամփոփման ընթացքում մրցույթի 53 մասնակիցները ստացան շնորհակալագրեր, իսկ նրանցից 6-ը գրավեցին մրցանակային տեղեր. երրորդ տեղը գրավեց երեք մասնակից, երկրորդը` երկու և առաջինը` մեկը: Մրցանակների արժանացան անվանակարգերում հաղթող մասնակիցները: Մրցանակաբաշխության ընթացքում տեղի ունեցավ «Նուռ» բանաստեղծությունների ժողովածուի շնորհանդեսը, որտեղ տեղ են գտել մրցույթի մասնակիցների ստեղծագործությունները:
Մրցույթը կազմակերպել է «Համահայկական երիտասարդական շարժում» հասարակական կազմակերպությունը` Երևանի գրողների միության, ՀՀ Սպորտի և երիտասարդության հարցերի նախարարության աջակցությամբ: Այն մեկնարկել է սույն թվականի օգոստոսի մեկին: Մրցույթին մասնակցել են 84 երիտասարդ բանաստեղծ ինչպես Հայաստանի հանրապետությունից, այնպես էլ սփյուռքից: Որոնցից ժյուրին ընտրել է 53-ին: Մրցույթի հաղթողներին ընտրել է ժյուրին` Երևանի գրողների միության նախագահ Աբգար Ափինյանի գլխավորությամբ:
Մրցանակաբաշխության ընթացքում շնորհակալագրեր ստացան նաև մրցույթի աջակիցները` Երևանի գրողների միությունը, ՀՀ Սպորտի և երիտասարդության հարցերի նախարարությունը, Սփյուռքահայ ուսանողների միությունը:
Կարդացեք նաև
«Համահայկական երիտասարդական շարժում» հասարակական կազմակերպության նախագահ Կառլեն Խաչատրյանի խոսքերով ծրագիրը կարևոր նպատակ ունի` բացահայտել տաղանդավոր երիտասարդների, ովքեր ստեղծագործում են չափածո ոճում: Նա նաև հույս հայտնեց, որ մրցանակաբաշխությունը շարունակական է լինելու:
Երևանի գրողների միության նախագահը միջոցառումը անվանեց ստեղծագործական բերկրանք և հավաստիացրեց, որ ընթերցողը գիրքն կարդալուց հաճույք կստանա.
«Նյութերը, որ մեզ են հասել զարմացնում են իրենց հայրենասիրությամբ, ասելիքի թարմությամբ, ստեղծագործական ստատիկությամբ: Շատ զարմանալի է տեսնել, որ մեր ժամանակակից գրականություն մտնելու հայտ են ներկայացնում այսքան թվով տաղանդներ»:
Մրցույթի առաջին տեղը գրավեց Դավիթը Ասատրյանը, ով «Առավոտի» հետ զրույցում խոստովանեց, որ սոցիալական ցանցերից պատահաբար իմացել է մրցույթի մասին, ուղարկել է 6 բանաստեղծություն` առանց որևէ սպասելիքի: Մրցութային բանաստեղծություններից Դավիթն առանձնացրեց իր «Լա’վ է լինելու» բանաստեղծությունը.
«Այն գրել եմ, երբ որ ազատամարտիկները հավաքվել էին և դժգոհում էին, բանաստեղծությունը իրենց է ուղղված: Եվ քանի որ հերոսները դարեր ժամանակներ չեն ճանաչում, իսկ իրենք իմ հերոսներն են, ես այդ պատճառով ինձ իրավունք եմ վերապահել իրենց «տղերքով» էլ դիմել»:
Հատված Դավիթ Ասատրյանի «Լա’վ է լինելու» բանաստեղծությունից.
Գիտեմ` ինչից եք այսքան խեղճացել
(Հաստատ դեռ շատ են հույսեր մորթվելու …)
Գիտեմ` ինչից եք այսպես համրացել,
Բայց հիշե’ք, տղե’րք, ԼԱ’Վ Է ԼԻՆԵԼՈՒ …
Ցավն է բույն դրել մեր սրտերից ներս.
Գիտեմ` շատերս չենք դիմանալու
(Գուցե առաջին ընկնողն եմ ես …)
Բայց մեկ է գիտեմ` ԼԱ’Վ Է ԼԻՆԵԼՈՒ …
Ամի ՉԻՉԱԿՅԱՆ
