«Այն, որ Սաակաշվիլու օրոք Չախալյանը ձերբակալված էր, եւ Իվանիշվիլին ազատեց նրան, դա նշանակում է, որ Իվանիշվիլի-Սաակաշվիլի հակադրության մեջ այդ հայը պետք է դառնար ընդամենը մի խաղաքարտ եւ Իվանիշվիլին պետք է օգտագործի նրան ցույց տալու համար, թե հայերի նկատմամբ ինքն ավելի բարեհամբույր եւ բարեխիղճ է: Իսկ Սաակաշվիլին բնականաբար պիտի ասի իմ համար մեկ է, դու հայ ես, ադրբեջանցի, թե վրացի`դու նախ Վրաստանի քաղաքացի ես»,- Aravot.am-ի հետ զրույցում ասաց սոցիոլոգ Ահարոն Ադիբեկյանը, անդրադառնալով հոկտեմբերի 25-ին Սուրբ Խաչ եկեղեցի այցելելու ճանապարհին Միխեիլ Սաակաշվիլի-Վահագն Չախալյան հանդիպմանը, որն ավարտվել էր միջադեպով:
Ահարոն Ադիբեկյանի խոսքով`այնտեղ խնդիրը մոնոազգային պետություն լինելն է, այսինքն` ճիշտ այնպիսին, ինչպիսին Մոլդովան է, Ադրբեջանը, Ռուսաստանը, որոնք բազմաէթնիկ են եւ ուզում են մոնոէթնիկ պետության նման լինել ու իրենց համար արհեստական խնդիրներ են ստեղծում. «Բոլոր դեպքերում սա ցույց է տալիս, որ վրացիները, նոր նախագահը մի քիչ մոռանա հայերի խնդրի մասին եւ դա պահի իր ուշադրության կենտրոնում: Այս դեպքում դա դրական արդյունք է, ինչը ցույց տվեց, որ Սաակաշվիլին մինչեւ վերջին պահը մնում էր իր վարած քաղաքականությանը հավատարիմ»:
Եվա ՀԱԿՈԲՅԱՆ
