Այսօր խորհրդարանում լրագրողների հետ ճեպազրույցում ՀՀ պաշտպանության նախարար Սեյրան Oհանյանը չհերքեց, որ ինքը Հայաստանի`Մաքսային միությանն անդամակցության ջատագովներից է: Նախարարի նման կեցվածքը պայմանավորված է Հայաստանի աշխարհագրական դիրքով:
Սակայն, ըստ նախարարի. «Մաքսային միության ջատագով լինելը չի նշանակում, որ պաշտպանության նախարարը այդ քաղաքականության գագաթնակետին է կանգնել: Հաշվի առնելով նաև մեր անվտանգային խնդիրները, որն իրականացնում ենք մեր հարևանների, ռազմավարական գործընկերների, նաև այն անվտանգային համակարգի շրջանակներում, որը կոչվում է Հավաքական անվտանգության պայմանագրի կազմակերպություն, և նաև այն, որ մենք մեր տնտեսությունը առաջին հերթին կարող ենք զարգացնել մեր հարևաններ հետ, ես գտնում եմ, որ մենք ճիշտ քայլեր ենք կատարում: Միգուցե ժողովրդի մոտ տեղեկատվության աստիճանը պիտի մի քիչ բարձրացվի»:
Նախարարը նշեց, որ «հարևանների հետ տնտեսական հարաբերություններ զարգացնել» ասելով՝ նկատի ունի ռազմավարական գործընկերներին: Անդրադառնալով այն հարցին, որ ոչ մի երաշխիքներ չկան, որ Ռուսաստանը կապահովի Հայաստանի անվտանգությունը, Սեյրան Օհանյանն ասաց, որ եթե ուսումնասիրենք պայմանագրա-իրավական համակարգը, որն ստորագրված է Հավաքական անվտանգության պայմանագրի կազմակերպության ու ռազմավարական գործընկերոջ հետ, ապա կտեսնենք, որ այդ երաշխիքները կան: «Այդ երաշխիքները հետզհետե զարգանում են, մեր անվտանգության ապահովման գործում նաև մենք համագործակցում ենք քաղաքական և ռազմական առումով նրանց հետ: Կարծում եմ, որ նաև նոր երաշխիքներ կան, որովհետև մենք այս տարի ռազմատեխնիկական համագործակցության զարգացման համաձայնագրի պլան մշակեցինք Ռուսաստանի Դաշնության հետ, որը հնարավորություն է տալիս ոչ թե պահպանել, այլ զարգացնել և դրանով իսկ հնարավորություն կա, որպեսզի ոչ միայն պաշտպանության նախարարությունները, այլ նաև մեր կազմակերպություններն արդեն երկկողմ շրջանակներում ուղղակի կապ ունենան և զարգացնեն իրենց համագործակցությունը: Ասել է, թե այս հարցում հետաքրքրությունները երկուստեք են, և յուրաքանչյուր երկիր ունի իր ծրագրերը, իր նպատակները»,- ընդգծեց նախարարը:
Սեյրան Օհանյանը՝ հարցադրում արեց՝ ինչո՞ւ չանդամակցել Մաքսային միությանը, եթե այնտեղ կան պայմաններ, որոնք կնպաստեն մեր տնտեսության զարգացմանը:
Կարդացեք նաև
Նելլի ԳՐԻԳՈՐՅԱՆ
