Փողերը ծախսվել են, նորոգումը կիսատ է մնացել:
Հոկտեմբերի 25-ին ՀՀ վարչապետ Տիգրան Սարգսյանը, մշակույթի նախարար Հասմիկ Պողոսյանը Իջեւանում մասնակցեցին արվեստի փառատոնի բացմանը:
Իջեւանի Շատրվանների հրապարակից, ուր մեկնարկեց փառատոնը, 30 մ հեռավորությամբ է գտնվում մարզային գրադարանը: Սակայն վարչապետը չտեսավ գրադարանի անմխիթար վիճակը: Գրադարանի շենքի նորոգումը սկսվել է 2011 թվականի հուլիսին, այդ նպատակով պետական բյուջեից ծախսվել է 54 միլիոն դրամ: Այժմ մարզային գրադարանի միայն առաջին հարկն է գործարկվում: Նորոգումը կատարվել է մեծ խախտումներով: Առաջին հարկի 2 սենյակներում, ուր տեղավորված են այցելուների սպասարկման, գրքերի մշակման եւ համալրման, մեթոդական եւ տեղեկատվական բաժինները, էլեկտրական հոսանքի լարեր չէին անցկացվել, գրադարանի աշխատակիցները ստիպված իրենք են հոսանքի գծեր անցկացրել: Նորոգված սենյակների պատերին բազմաթիվ ճեղքեր կային, նաեւ` խոնավության հետքեր: Նախասրահում գտնվող զուգարանների նորոգումն անավարտ էր մնացել: Մարզային գրադարանի երկրորդ հարկը հիշեցնում է լքված շինարարական հրապարակ: Այնտեղ սենյակներում «եվրոդռներ» եւ <եվրոպատուհաններ» են տեղադրված, սենյակներից մեկի պատուհանագոգին , դրսից ի տես, գրքեր են դասված: Նորոգման աշխատանքների կիսատ մնալու պատճառով մարզային գրադարանի գեղարվեստական գրականության մի մասը`20 հազար կտոր գրականություն, գտնվում է Իջեւանի թիվ 5 դպրոցում: Շենքի երկրորդ հարկի ամրացման նպատակով այն ցանցապատվել է, սակայն գործը կանգ է առել:
Մարզային գրադարանի տնօրեն Սաշա Հովսեփյանն ասաց, որ շենքի հիմնանորոգումը կատարած շինարարական կազմակերպությունը վերացրել է առաջին հարկի շինարարական թերությունները: Սակայն երկրորդ հարկում աշխատանքներ չեն արվում: Ո՞վ պետք է պատասխան տա ՀՀ մշակույթի նախարարության ենթակայության ներքո գտնվող Տավուշի մարզային գրադարանի ձախողված հիմնանորոգման համար:
Ոսկան ՍԱՐԳՍՅԱՆ
