Այսօր խորհրդարանում, ներկայացնելով 2014 թվականի բյուջեի նախագիծը, վարչապետ Տիգրան Սարգսյանը հայտարարել էր, թե գործազրկության նպաստների 94 տոկոսը նպատակին չի ծառայել: Իր ելույթից անմիջապես հետո վարչապետը հեռացել էր, հետևաբար պատգամավորները հնարավորություն չունեցան նրան հարցեր ուղղելու: Ուստի, ավելի ուշ ՀՅԴ խմբակցության պատգամավոր Արծվիկ Մինասյանը ֆինանսների նախարար Դավիթ Սարգսյանին հորդորեց վարչապետին զգուշացնել, որպեսզի նա լրացուցիչ հայտարարությամբ հանդես գա գործազրկության նպաստների ծախսի արդյունավետության վերաբերյալ:
Արծվիկ Մինասյանը նկատեց, որ չի կարող միջոցների 94 տոկոսը փոշիանալ, իսկ եթե փոշիացել է, ապա հարց է ծագում՝ իրավապահ մարմիններն իրենց ուշադրության կենտրոնում պահո՞ւմ են այս հարցը, ինչ քայլեր է ձեռնարկել այդ ուղղությամբ կառավարությունը:
Ֆինանսների նախարար Դավիթ Սարգսյանն ասաց, որ շատ դեպքերում, երբ փոշիացում է տեղի ունենում, դա չի նշանակում, որ գողացել են կամ վատ կերպով են ծախսել այդ գումարները. «Խոսքը գնում է այն մասին, որ եթե ունենք հարյուր դրամ, որը պետք է ծախսենք ու էֆեկտ ստանանք, ծախսում ենք, բայց այն էֆեկտը չենք ստանում: Քիչ ենք ստանում կամ զրո ենք ստանում, այն արդյունքը չէ, որին սպասում ենք»:
Նելլի ԳՐԻԳՈՐՅԱՆ
