«Ես միանում եմ այդ ազատամարտիկների արդար պայքարին, ներառյալ Վոլոդյա Ավետիսյանի այդ խափանման միջոցի վերաբերյալ: Իշխանությունը հերթական անգամ ավելի վիրավորական ձևով ապացուցում է, որ քաղաքական հիմքերով է ընտրում այդ խափանման միջոցը», -հոկտեմբերի 26-ին «Ելակետ» մամուլի ակումբում լրագրողների հետ հանդիպման ընթացքում հայտարարեց «Ընդդեմ իրավական կամայականությունների» հասարակական կազմակերպության նախագահ Լարիսա Ալավերդյանը:
Ասուլիսի ընթացքում Լարիսա Ալավերդյանը նկատեց, որ ժողովուրդը չի վստահում դատական համակարգին և դատական համակարգից դժգոհ են դիմողների ավելի քան 80 տոկոսը. «Նրանք, ովքեր շահում են գործը գիտեն, թե ինչ ճանապարհով է դա տեղի ունենում: Այսինքն՝ զուտ աշխատավարձի բարձրացումով փորձել փոխել որևէ վիճակ, դա ուղղակի որևէ քննարկության ենթակա չէ»:
Ըստ նրա՝ Հայաստանի քաղաքական դերակատարությունը կարող է հարուստ գույներ ունենալ, որովհետև Արևմուտքի հարաբերությունները արևելյան երկրների հետ, մասնավորապես Իրանի, չեն կարող անընդհատ լարված մնալ:
Ասուլիսի ընթացքում Լարիսա Ալավերդյանն անդրադարձավ նաև տարածված խոսակցություններին, որ Ռուսաստանի դաշնությունը ցանկանում է վիզայի ռեժիմ մտցնել ԱՊՀ երկրների հետ: Նրա խոսքով, այդ խոսակցությունները չեն կարող հավաստի լինել. «Դա չի մտցվելու գոնե երկու առումով. նախ և առաջ Մաքսային միության պատճառով, երկրորդը, հենց այն պատճառով, որ Ադրբեջան-Հայաստան սահմանը պաշտպանված է»:
Կարդացեք նաև
Տիկին Ալավերդյանը կարծում է, որ ռուսաստանաբնակ հայերը վտանգված են, և այդ վտանգը շարունակելու է սպառնալ այնքան ժամանակ, մինչև մենք շարունակում ենք բնակվել այս տարածաշրջանում. «Ինչպես ժամանակին Ժվանեցկին է ասել, խփում են ոչ թե անձնագրին, այլ դեմքին: Այսինքն՝ դեմքով են նրանք կողմնորոշվում»:
Տիկին Ալավերդյանի խոսքերով հնարավոր է ռուսաստանաբնակ հայերի վերադարձը, սակայն Հայաստանը տնտեսական, սոցիալական առումով պատրաստ չէ հետ ընդունել նրանց:
Ամի ՉԻՉԱԿՅԱՆ
