Կոմպոզիտորների միության համագումարի ընթացքում այսօր տարաձայնություններ առաջացան՝ համագումարն անցկացնող մարմիններ ընտրելու ժամանակ: Կոմպոզիտոր Վլադիլեն Բալյանը անգամ զայրացավ. «Թողեք աշխատենք, ես ձեզ համար Դոն Կիխոտ չեմ»: Ապա` կոմպոզիտոր Վահրամ Բաբայանին, որը վերջին շրջանում հակաամիրխանյանական ասուլիսներ էր տալիս, Վլադիլեն Բալյանը փորձեց կարգի հրավիրել. «Վարպետ ես վարպետ, անգամ քո ուսուցիչ Գրիգորի Իլյիչին ես գերազանցել քո վարպետությամբ»:
Կոմպոզիտոր Երվանդ Երկանյանը հինգ հարց ուղղեց համագումարին,
Ռոբերտ Ամիրխանյանից առաջ խոսք էր խնդրում Վահրամ Բաբայանը, սակայն Վլադիլեն Բալյանը նրան խոսքի իրավունք չտվեց. «Չեմ տալու»: Ամիրխանյանը պատրաստ էր զիջել ելույթի իր հերթը, սակայն նրան հրավիրեցին բեմ:
«Ոչ մի ամբիցիա մեզ օգուտ չի բերի, եթե պետք է հեռանամ, կհեռանամ եւ կլինեմ երջանիկ, ես ամբիցիաներ չունեմ, ինձ համար կարեւորը իմ եւ իմ ընկերների երաժշտությունն է, ես ուզում եմ, որ միությունը պահպանի այն ամենը, ինչ ժառանգել է իր մեծերից»,-ասաց գործող նախագահը:
Կարդացեք նաև
Նա կոչ արեց բանականության պայամններում անցկացնել համագումարը եւ չարատավորել կոմպոզիտորների միության սրբազան անունը:
Սրբազա՞ն՝ հեգնական ռեպլիկ հնչեց դահիճից: «Այո, սրբազան»,- ասաց Ամիրխանյանը եւ կոչ արեց բոլոր նրանց, ում տհաճ է իր խոսքը, դուրս գալ դահլիճից: Նա նաեւ անհեռատես անվանեց այն մարդկանց, որոնք կոմպոզիտորների միությունը կապում են Սովետական միության հետ:
«Այն, ինչ կատարվում է կոմպոզիտորների միության հետ, բնորոշ է բոլոր միություններին, պատճառն այն է, որ մեզ տարիներ շարունակ տվել են խոստումներ, սակայն չեն իրագործել: 2004-ին Ազգային Ժողովի «շնորհիվ» ստեղծագործական միությունները դարձան ոչ առեւտրային կազմակերպություններ: Ջնջվեցին մեր բոլոր պատմական հետքերը, բոլոր հարցերը մնացին օդում կախված՝ առանց բացատրության: Նրանց գուցե վախեցնո՞ւմ էր միություն բառը, որը, հավանաբար, կապվում էր Սովետական միության հետ, բայց չէ՞ որ կա Եվրամիություն, Իրանահայերի միություն…»,-տարակուսեց Ռոբերտ Ամիրխանյանը: Նրա ձեւակերպմամբ, դա միությունները կազմալուծելու եւ ունեցվածքը նրանցից խլելու առաջին քայլն էր: Կոմպոզիտորների միության գործող նախագահը դիտավորություն անվանեց այն հայտարարությունները, թե քսաներկու տարի կոմպոզիտորների միությունը ոչինչ չի արել. «Այլ հարց է, եթե ինչ-որ բան արել ենք, բայց վատ ենք արել»:
Գոհար ՀԱԿՈԲՅԱՆ
