«Հանդիպում են Ավստրիան եւ Հայաստանը» ծրագրի շրջանակում, այսօր ժամը 20:00-ին, Նարեկացի արվեստի միությունում տեղի կունենան ջազ-համերգ` Քրիստոֆ Չեխը եւ իր Եռյակը:
Ավստրիացի հայտնի կոմպոզիտոր, ջազ-երաժիշտ Քրիստոֆ Չեխը երկրորդ անգամ է Հայաստանում: «Մենք որպես ավստրիացիներ, պետք է հասկանանք, թե Վիեննայից այն կողմ, ինչ արմատներ կան: Ես զգում եմ, որ իմ երաժշտությունն այստեղ հայրենիք ունի»,-ասաց նա` հավելելով, որ Ավստրիայում առկա ազգային երաժշտության եւ ջազի միջեւ կան հակադրություններ: «Ազգայինը ծառայում է ավելի շատ տուրիզմի բնագավառում: Մեր ջազային կատարումներում եւս կան ազգային տարրեր»,-ընդգծեց երաժիշտը` նկատելով, որ, թեեւ ջազի հիմքում կոմպոզիցիան է, այնուամենայնիվ այն ենթակա է փոփոխության, քանի որ ջազում իմպրովիզներ շատ են լինում:
Դոկտոր Իռեն Զուխին էլ ընդհանրական նմանություններ է տեսնում Հայաստանի եւ Ավստրիայի միջեւ: Ըստ նրա` համերգի նպատակն է նաեւ սերտ հարաբերություններ ստեղծել երկու երկրների միջեւ մշակույթի ասպարեզում, ինչպես ինքն է ասում.«Թե՛ հայկական երաժշտությունը, եւ թե ավստրիական երաժշտությունը մի տեսակ դուխ ունեն իրենց մեջ»:
Քրիստինա ՄԻՐԶՈՅԱՆ
Լուսանկարը՝ PanArmenian Photo-ի
