«Հանրապետություն» կուսակցության ղեկավար Արամ Սարգսյանի խոսքով Հայաստանում վերջին բոլոր ընտրություններին գործել է համակարգ, որը ղեկավարվել է Մոսկվայից: «Դրա վկայությունն է՝ 2003 թվականին նախագահական ընտրություններից հետո ընդդիմադիր երկրորդ ուժի երկրորդ փուլին՝ ժողովրդական շարժմանը չմիանալուն եւ դրանով իսկ հաղթող թեկնածուի հնարավորությունները փոքրացնելուն:
Թե 2008-ին նախագահական ընտրություններից հետո ընդդիմադիր երկրորդ ուժի՝ քաղաքացիական գործընթացներին եւ հանրահավաքներին չմասնակցելը եւ մարտի մեկից հետո իշխանության հետ կոալիցիա կազմելը: Ինձ համար ակնհայտ է, որ այս ուժերին իրար հետ համերաշխեցնում ու ուղղորդում է ռուսական քաղաքական ուժը, որը համակարգված է գործում Հայաստանի ներսում գործող իրական ընդդիմադիր ժողովրդական ուժերի հետ: Մենք էլ պետք է ձեւավորենք համակարգ, որ համակարգն է մրցակցելու համակարգի հետ»,- այսօր ՀՀՇ հիմնադիր համագումարի ժամանակ ասաց «Հանրապետություն» կուսակցության ղեկավար Արամ Սարգսյանը:
Նրա խոսքով, ինքը փորձում է եղբոր՝ Վազգեն Սարգսյանի գործը շարունակել, դիտարկմանը, թե նա ռուսամետ էր, իսկ դուք արեւմտամետ, ասաց, պարոն Սարգսյանն ասաց. «Դա կարող եք դուք այդպես համարել եւ այն մարդիկ, որոնք քիչ են ճանաչել Վազգեն Սարգսյանին եւ այն ուժերը, որոնց ձեռնտու է այդպես համարել…Վազգեն Սարգսյանը գործում էր հանուն Հայաստանի հանրապետության շահի: Եթե մտածում եք, որ Վազգեն Սարգսյանը համաձայն լիներ, որ Հայաստանը եվրասիական միության անդամ դառնար կամ ռուսական պաշտոնյաները գային այստեղ ու մեծ-մեծ խոսեին, թե հայկական բանակի փոխարեն այսուհետեւ ՀԱՊԿ-ը պետք է ներկայացնի ՆԱՏՕ-ում, չարաչար սխալվում եք»:
Հարցին, թե ԵՄ- Վազգեն Սարգսյանը կողմ կլինե՞ր. «Միանշանակ Վազգեն Սարգսյանը ազատ շուկայական տնտեսության, հավասար մրցակցության կողմնակից մարդ էր: ԵՄ-ը կայացած կառույց է, Մաքսային միությունը, որպես այդպիսին գոյություն չունի: Մենք ուզում ենք ընտրություն անել մի բանում, որտեղ մեկում մենք ենք ուզում մաս կազմել, մյուսում՝ պարտադրում են: Դեմ եմ ցանկացած պարտադրանքին, առավել եւս այն պարտադրանքին, որը ապագա չունի»: Վերջում էլ հավելեց. «Մեզ համար նախանշել ենք մինիմում եւ մաքսիմում ծրագրեր. պետք է ամեն ինչ արվի, որ Հայաստանը այդ գոյություն չունեցող, անհեռանկար, զուտ Ռուսաստանի շահերից բխող Մաքսային միությանը չանդամակցի: Պետք է ամեն ինչ արվի, որ Թեկուզ ոչ Վիլնյուսում, բայց հետագայում, Հայաստանը հնարավորություն ունենա համամարդկային արժեքներին համարժեք կյանքով ապրի»:
Կարդացեք նաև
Արփինե ՍԻՄՈՆՅԱՆ
