«Անտարես» մեդիա հոլդինգի նախագահ Արմեն Մարտիրոսյանն «Առավոտին» հայտնեց իր անհանգստությունը՝ գրքի հանդեպ իշխանության հերթական ոտնձգության մասին: Նրա հավաստիացմամբ՝ Հայաստանի գործարարներին պարտադրում են գնել ՀԴՄ «կրակմարիչներ», ինչը ժամանակին անարդյունավետ պարտադրվեց վարորդներին: «ՀԴՄ-ների 2012թ. օրենքում փոփոխությունների արդյունքում եւ 2013թ. կառավարության երեք որոշումների համաձայն՝ գործարարը պարտավոր է 2013թ. նոյեմբերի 1-ից ունենալ 369.600 դրամանոց ՀԴՄ՝ այն դեպքում, երբ բոլոր տնտեսվարողներն ունեն ՀԴՄ-ներ առանց WI-FI-ի, ինչը կարող է գնման մասին տվյալը ակնթարթորեն հասցնել հարկային տեսչությանը: Առաջին հայացքից պրոգրեսիվ օրենք է հարկերի հավաքագրման համար, սակայն սա բիզնես է՝ հօգուտ ինչ-որ մեկի»,- հայտնեց պարոն Մարտիրոսյանը՝ հավելելով, թե հակառակ դեպքում ՀԴՄ-ները կունենային այլընտրանքային ներկրողներ, ինչի արդյունքում մրցակցային տարբերակներ եւ գների անկում կարձանագրվեին:
«Ամենախոցելի բնագավառը գիրքն է, քանի որ դրա գնողունակությունն ու շահութաբերությունը շատ ցածր են: Ստացվում է, որ տարվա շահույթը հազիվ կհերիքի ՀԴՄ գնելու համար»,- համոզված է Արմեն Մարտիրոսյանը:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
