Հրանտ Դինքի սպանությունը դրդելու մեջ կասկածվող Էրհան Թունջելը վերջերս հանդիպել է նախկին Հռոմի Պապ Հովհաննես Պողոս Երկրորդի դեմ 1981թ. մահափորձ գործած Մեհմեթ Ալի Աղջայի հետ: Հայտնում է «Հյուրիեթ» թերթը:
Թունջելը, որը 38 օր գտնվում էր փախուստի մեջ, հայտնաբերվել է հոկտեմբերի 23-ին, ձերբակալվել՝ 24-ին: Նա թաքնված է եղել Ստամբուլի Կումբուրգազ թաղամասում, թեպետ, ըստ «Հյուրիեթ»-ի ստացած տեղեկությունների, տեղացիներն ու ոստիկանությունը տեղյակ էին, թե ով է նա:
Աղջայի հետ նա հանդիպել է սրճարանում ընդհատակում գտնվելու ժամանակ և ասել. «Ես ձեր մեծ երկրպագուն եմ», – «Հյուրիեթ»-ին ասել է իրենց աղբյուրը, որի անունը թերթը գաղտնի է պահում:
Նրանք հետագայում մի շարք առիթներով նույն վայրում շարունակ հանդիպել են և «երկարատև զրույց ունեցել», ըստ ականատեսների վկայության:
Կարդացեք նաև
Սրճարանը տրամադրել էր Էլազիգ նահանգից Թունջելի ընկերը: Ընդհատակում գտնվելու ժամանակ Թունջելը հիմնականում ծովի մոտ էր իր ժամանակն անցկացնում՝ գիրք կարդալով:
«Նա իր հետ ուներ երկու բջջային հեռախոս, ծխախոտ և գրքեր: Նա շատ չէր խոսում: Մենք տեսնում էինք նրան Էլազիգի իր ընկերոջ հետ զրուցելիս և երբեմն ոստիկանության հետ: Ոստիկանները նրան դիմում էին «Պարոն Էրհան», – թերթին ասել են ականատեսները:
Թուրքահայ լրագրող Հրանտ Դինքի 2007թ. սպանության ժամանակ Թունջելը եղել է Տրապիզոնի ոստիկանության իրազեկիչը:
Պատրաստեց Հովհաննես ԻՇԽԱՆՅԱՆԸ
