Ավան և Նոր Նորք վարչական շրջանների ընդհանուր իրավասության դատարանում այսօր նշանակվել էր ՀՀ քիք-բոկսինգի ազգային ֆեդերացիայի մարզիկ, ԱՊՀ, Եվրոպայի,աշխարհի ոսկե մեդալակիր, գավաթակիր Վարաժ Մանուկյանի դեմ հարուցված քրեական գործով հերթական դատական նիստը:
Դատական նիստին քրեակատարողական հիմնարկից ժամանակին բերվել էր ամբաստանյալ Վարաժ Մանուկյանը, ներկայացել էր նրա պաշտպանը` ՀՀ փաստաբանների պալատի անդամ լուսինե Մարտիրոսյանը:
Սակայն չէր ներկայացել մեղադրանքը պաշտպանող դատախազը` Հրանտ Չախոյանը, որը բանավոր տեղեկացվել էր, թե սպանության գործով` «աշխատանքային ծանրաբեռնվածության» պատճառով չի կարող մասնակցել նիստին:
Մեր տեղեկություններով, երկրորդ զանգվածում սպանվել էր քառասունամյա մի աղջիկ, եւ նա հենց այդ դեպքն էր նկատի ունեցել:
Կարդացեք նաև
Դատավոր Դավիթ Հարությունյանն ասաց, որ դատախազի կողմից անհարգալից վերաբերմունք է դատարանի նկատմամբ, եւ ասաց, որ հաջորդ նիստին սանկցիա կկիրառի նրա նկատմամբ: Ի դեպ, նկատենք, որ Դավիթ Հարությունյանը դատական նիստը սկսեց «Հարսնաքար» ռեստորանային համալիրում անցյալ տարվա բռնարարքների գործով դատական նիստն ավարտելուց անմիջապես հետո, ճիշտ ժամանակին, առանց մեկ րոպե հանգստանալու:
Հիշեցնենք, որ 2011թ.սեպտեմբերի 20-ին Նորքի 4-րդ զանգվածի Բակունցի 1-ին նրբանցքի 3-րդ շենքի մոտ սպանվել էր Դավիթ Օհանյանը:
Սպանության համար մեղադրանք է առաջադրվել ամբաստանյալի նկատմամբ:
Ամբաստանյալն իր կարճատեւ ցուցմունքի ժամանակ հայտնել էր, որ դանակով հարված է մեկ այլ տուժողի Հակոբ Բուդաղյանին, իսկ Դավիթի սպանության հետ ինքը կապ չունի:
Այս գործով «գաղտնի» վկաներից մեկը հայտնել էր. «Վարաժի հետ էին Բորիկի տղա Լոլոն, Չոռնի մականունով Արմենը, որի հայրանունը Ռոբերտ է` Հայրապետյան, Ճուտը, , որի անունը Դավիթ է, ազգանունը Օհանյան, հայրը մահացած է:Այդտեղ էր նաեւ Հակոբը, ազգանունը Բուդաղյան, որին շատ լավ ճանաչում եմ, Նարեկն ու նրա երեք-չորս ընկերները: Ասեմ, որ Վարաժը , Նարեկն ու նրա երեք-չորս ընկերները մի կողմից էին կռվում, Հակոբի, Դավթի, Չոռնիի, Լոլոյի հետ, այն անձինք էլ կային, որոնց չճանաչեցի: Նարեկն ու Վարաժը, երեք-չորս ընկերները հարվածում էին Լոլոյին, Դավթին, Հակոբին, Չոռնիին, նրանց ընկերներին, որոնց դեմքերը չհասցրեցի տեսնել, որ ճանաչեմ»:
Վարաժ Մանուկյանն ընդունել է միայն Հակոբ Բուդաղյանին դանակով վնասվածք հասցնելու մեղադրանքը, ասելով` ինքը մարդասպան չէ, եւ Դավթին չի հարվածել:
Ռուզան ՄԻՆԱՍՅԱՆ
