«Դժվար է գործ ունենալ վիրավոր եւ բութ հավատացյալի հետ»,- այսօր խորհրդարանական ճեպազրույցների ժամանակ հայտարարեց ՀՀԿ խմբակցության ղեկավար Գալուստ Սահակյանն`անդրադառնալով նախօրեին հրապարակված Լեւոն Զուրաբյանի եւ Զարուհի Փոստանջյանի խոսակցության սղագրությանը`ԱԺ նախագահի մոտ տեղի ունեցած միջազգային պատվիրակությունների ձեւավորման առիթով քննարկման ժամանակ։ Հիշեցնենք, որ Զարուհի Փոստանջյանը Լեւոն Զուրաբյանին ասել էր. «Յա, այ Լյովիկ, էլի թռա՞ր… Ոնց որ Եվրախորհրդի նիստի ժամանակ հատուկ ուշ գրանցվեցիր, որ Սերժ Սարգսյանին հարց չտաս, հիմա էլ այստեղ ես թռնում, որ հանկարծ իշխանությունների հետ հարաբերություններդ չվատացնես»:
«Դա կարգի հրավիրվող տեսակ չէ»,- Փոստանջյանի մասին ասաց Սահակյանը՝ հավելելով, որ ինքը չի կարդացել սղագրությունը, բայց քննարկմանը ներկա է եղել. «Բնականաբար Լեւոն Զուրաբյանը ստիպված եղավ պատասխանել, մենք արդեն սովորել ենք, ռեակցիա էլ չենք տալիս արդեն, անիմաստ բան է, դժվար է գործ ունենալ վիրավոր եւ բութ հավատացյալի հետ։ Լեւոն Զուրաբյանի ջղերը չդիմացան, փորձեց կարգի հրավիրել, թերեւս փորձ չուներ, որ չի կարելի այդպես անել, դա կարգի հրավիրվող տեսակ չէ, խոսակցություններ եղան, որը արդարացված է Լեւոն Զուրաբյանի կողմից»,- ասաց նա։
Նելլի ԳՐԻԳՈՐՅԱՆ
