Այսօր տնտեսական մրցակցության պաշտպանության պետական հանձնաժողովը բջջային կապի օպերատոր «ԱրմենՏել» ընկերությանը տուգանեց 20 միլիոն դրամով:
«Օրանժ Արմենիա»-ն դիմել էր հանձնաժողով՝ դժգոհելով, որ «ԱրմենՏել» ընկերության «Պարզից Պարզ» սակագնային փաթեթի գովազդում ներկայացված են նարնջագույն եւ կարմիր գույներով ներկված բիլիարդի գնդակներ, որոնք ակնհայտորեն մատնացույց են անում շարժական կապի մյուս 2 օպերատորներին, որոնք համարվում են «պայքարում պարտված»: Ըստ «Օրանժ Արմենիա» ընկերության, «ԱրմենՏելի» նման վարքագիծը կարող է վնաս պատճառել իրենց համբավին եւ գործարար վարկանիշին:
Մեկ այլ բողոքում էլ «Օրանժ Արմենիա»-ն կրկին մատնացույց անելով «Պարզից Պարզ» փաթեթը, հանձնաժողովին հայտնել է, որ այն իր՝ «Պարզ» անվանումով սակագնային փաթեթի կրկնօրինակումն է եւ տեղեկացրել է, որ այդ անվանումը դեռեւս 2011-ին գրանցվել է մտավոր սեփականության գործակալությունում՝ որպես սպասարկման նշան:
ՏՄՊՊՀ-ն ուսումնասիրելով խնդիրը՝ պարզել է, որ «ԱրմենՏելն» իսկապես խախտել է օրենքը եւ անբարեխիղճ մրցակցություն է դրսեւորել: Խնդրի հետ կապված, ըստ հանձնաժողովի նախագահ Արտակ Շաբոյանի, «ԱրմենՏելը» որեւէ հիմնավորում չի ներկայացրել:
Կարդացեք նաև
Այսօր հանձնաժողովը ներկայացրեց մի շարք խանութներում կատարված դիտարկումների արդյունքները, որոնց համաձայն` «Ռուժ» խանութ-սրահը, «Բեյսիկ Հաուս»-ը, «Կաշառել» խանութ-սրահը, «Օրկեստրա», «Մի-մի» խանութ-սրահները, եւ մի շարք այլ հագուստի վաճառքով զբաղվող խանութներ մոլորեցնում են սպառողներին` խանութի դիմապակուն փակցնելով 50 կամ 70 տոկոս զեղչ՝ ողջ տեսականու համար, սակայն, իրականում, միայն հատուկենտ ապրանքների գնման դեպքում են գործում նշյալ զեղչերը:
Խախտում թույլ տված ընկերություններից հանձնաժողովի նիստին ներկա էին մի քանի ընկերության պատասխանատուներ, որոնք վստահեցրին, որ միտք չեն ունեցել սպառողներին մոլորեցնելու եւ օրենքի չիմացության հետեւանքով են խախտումը թույլ տվել: Ըստ «Բեյսիկ Հաուս» խանութների ցանցի տնօրեն Համիկ Մարտիրոսյանի, խախտումը վերացրել են եւ այլեւս չեն կրկնի: Նրա պարզաբանումները հանձնաժողովին` տեսանյութում
Սպառողներին մոլորեցրած խանութներին այս անգամ հանձնաժողովը միայն խիստ նկատողություն հայտարարեց` զգուշացնելով, որ խախտումը կրկնելու դեպքում մեծ տուգանք կկիրառի:
Լուսինե ԲՈՒԴԱՂՅԱՆ
