«Ի՞նչ է Զորիի նմանների հայտարարությունը՝ նվաստացնող, արժանապատվությունը ոտնահարող: Ուրիշին ասում է՝ արի իմ տունը պահի, իմ երեխեքին պահի: Էդպես կարելի է հարեւանին հրավիրել կնոջն ու երեխեքն էլ տիրություն անելու: Եվ սա պետական քաղաքականություն է»,- այսօր խորհրդարանական ճեպազրույցներում իր վրդովմունքը բարձրաձայնեց ՀԱԿ խմբակցության քարտուղար Արամ Մանուկյանը`պատասխանելով երեկ Մինսկում ձեռք վերված համաձայնություններին`Մաքսային միությանն անդամակցելու վերաբերյալ:
Ըստ Արամ Մանուկյանի Հայաստանի իշխանությունները կորցրել են երկրի սուվերենությունը: Նա նշեց, որ 90-ականներին Հայաստանը պահպանում էր իր սուվերենությունը, ուներ շատ բարեկամներ, սակայն ոչ մի երկիր Ղարաբաղի հարցում թթու խոսք չէր ասում Հայաստանին: Իսկ այսօր, ըստ նրա, չկա որևէ կառույց, որը կասի, որ Ղարաբաղը ինքնորոշման հիման վրա պետք է լինի անկախ: «Այն դեպքում, երբ մտնում ենք որևէ կառույցի մեջ և դրա տեղը տալիս ես, ոչ թե ստանում, սա կոչվում է սուվերենության կորուստ: Գույք պարտքի դիմաց ծրագրից սկսած մենք կորցրեցինք մեր սուվերենությունը: Ուզեցին, տվեցինք»,- ընդգծեց նա: Արամ Մանուկյանի խոսքով՝ այսօր չես գտնի մի միջազգային կառույց, որը կասի, թե Հայաստանն այս կամ այն հարցում ճիշտ է: Նրա խոսքով՝ նախկինում ղարաբաղյան կոնֆլիկտն ունեցել է երեք կողմ, հիմա ունի երկու կողմ, այս կողմը զիջում է, տալիս է ու տալիս:
Արամ Մանուկյանն անդրադարձավ նաև արտագաղթին՝ նշելով, որ այս տարվա ինն ամիսներին Վերին Լարսի անցակետով Հայաստանից հեռացել է 160 հազար ՀՀ քաղաքացի: «Դա նշանակում է, որ մի Գյումրի ու Վանաձոր ոչնչացել է: Մեր երկիրը ոչնչանում է, մարդիկ կորցնում են պայքարելու հույսը»,- ասաց նա:
Նելլի ԳՐԻԳՈՐՅԱՆ
