«Եվրոպական կառույցներում այս պահին որոշ չափով կանխատեսելի մոտեցում կա, դա կանխատեսելի էր նաեւ սեպտեմբերի սկզբից, երբ ՀՀ նախագահը իր որոշումը հայտնեց Մաքսային միությանը միանալու մասին»,- այսօր «Տեսակետ» ակումբում ասաց քաղաքագետ Սերգեյ Մինասյանը:
Սերգեյ Մինասյանը հավանական համարեց այն, թե Վիլնյուսում կլինի մի փաստաթուղթ, որը հնարավորություն կտա Հայաստանում կատարած աշխատանքը եզրափակել եւ սկսել նոր աշխատանքներ, այն մասին թե ինչպես կաշխատեն Հայաստանն ու Եվրոպան առաջիկայում:
«Չգիտեմ Հայաստանը կլինի՞ Մաքսային միության անդամ, թե՞ ոչ, ես չեմ պատկերացնում, բայց եթե այդպես լինի, ապա չգիտեմ ինչ պայմաններով կլինի: Հասկանալի է մի բան, ստիպելով հրավիրել Մաքսային միություն` դա ուներ քաղաքական նպատակ, որի իմաստն այն էր, որ Հայաստանը չստորագրի Ասոցացման համաձայնագիրը»,-նշեց Սերգեյ Մինասյանը՝ ավելացնելով, թե ավելի վատ բան, որը կարող էր ազդել Հայաստանի վարկանիշի վրա՝ արդեն եղել է ու դրանից վատ բան հավանաբար չի էլ լինի:
Սերգեյ Մինասյանի խոսքով`ինչքան էլ ՀՀ իշխանություններն ասեն, թե որեւէ ճնշում չի եղել մեզ վրա, կապված Մաքսային միության հետ` միեւնույն է դա որեւէ մեկին չի համոզում ու այս որոշումը կայացվել էր առաջին հերթին անվտանգության խնդիրներից ելնելով:
Կարդացեք նաև
«ՀՀ իշխանություններն ունեին հնարավորությունը ընտրելու վատը, կամ` ամենավատը եւ նրանք ընտրեցին ամենավատը»,- ավելացրեց Սերգեյ Մինասյանը, ասելով, որ ոչ Բելառուսը, ոչ էլ Ղազախստանը ցանկություն չունեն Հայաստանին տեսնել Մաքսային միության մեջ:
Եվա ՀԱԿՈԲՅԱՆ
