Հայաստանի Հանրապետության հողերը տեղական ինքնակառավարման մարմինների կողմից տարբեր տարիների վաճառվել են Հայ ավետարանչական ընկերակցությանը, որը ոչ թե բարեգործական, այլ կրոնական կառույց է:
Այդ կազմակերպությունը դեռևս 2000 թվականից ՀՀ կառավարության կողմից գրանցվել է իբրև բարեգործական ընկերություն, սակայն 2005 թվականից դարձել է կրոնական: Այսօր այս մասին լրագրողների հետ հանդիպման ընթացքում ասաց Քայքայիչ պաշտամունքներից տուժածների օգնության և վերականգնողական կենտրոնի ղեկավար Ալեքսանդր Ամարյանը` հավելելով, որ ընկերակցության կողմից գնված բոլոր հողերը հանդիսանում են ԱՄՆ-ի սեփականություն, որը հակասում է մեր Սահմանադրությանը:
Ըստ Ամարյանի, բոլոր աղանդավորական շարժումների հիմքում իշխանությունն ու փողն են: «Ուսումնասիրությունները ցույց են տվել, որ այդ կազմակերպությունները ֆինանսավորում են Հայ առաքելական եկեղեցու դերը նվազեցնելու համար, սակայն դա միայն իրականության մի մասն է: Միայն դրա համար ոչ ոք գրանտ չի տա: Ընդդիմադիր շարժումները ևս ֆինանսավորվում են այդ կառույցների կողմից»,-ընդգծեց նա:
Այժմ բանախոսն ուսումնասիրում է Գյումրիում ընթացող դատական գործը: Հենց քաղաքի կենտրոնում Հայ ավետարանչական ընկերակցությանն է վաճառվել հողատարածք, որը այժմ ԱՄՆ-ի սեփականությունն է: ԱՄՆ-ին է պատկանում նաև Բաղրամյան 18 հասցեում գտնվող նրանց կենտրոնը, ինչպես նաև տարածք՝ Վանաձորում:
Կարդացեք նաև
«Ես դա պարզել եմ վերջերս` Գյումրիում Մկրտիչ Գրիգորյանի դատավարության ընթացքում: Նաև պարզել եմ, որ տեղական ինքնակառավարման մարմինները մեր հողերը վաճառել են հայ ավետարանչական ընկերակցությանը, որի կանոնադրության մեջ նշված է, որ իրենց ողջ գույքը պատկանում է ամերիկյան գրասենյակին»,-հայտնեց Ամարյանը:
Ալեքսանդր Ամարյանը առաջիկայում պատրաստվում է հրապարակել իր ձեռքի տակ եղած փաստերը, որոնց մեջ են առքուվաճառքի հետ կապված բոլոր փաստաթղթերը:
Վերջինս նշեց նաեւ, որ հարկային տեսչության և աշխատանքի տեսչության համար մեծ աշխատանք կա` հաշվի առնելով, որ Հայ ավետարանչական ընկերակցության Գյումրիի մասնաճյուղը շենքերի կառուցման, շինարարության, վերանորոգման համար ահագին մարդկանց է ընդունել աշխատանքի, բայց որևէ մեկը գրանցված չի եղել: «Այսինքն` թաքնված աշխատուժ»,- տալով կատարվածի իրավական որակումը, ասաց կենտրոնի ղեկավարը:
Ինչպես Ալեքսանդր Ամարյանը տեղեկացրեց, Գյումրիում Մկրտիչ Գրիգորյանը հիշյալ կառույցի համար լիազորագրով կատարել է մի շարք գործարքներ, 10 տարի աշխատել է նրանց համար, շատ բան ձեռք բերել, վերջում իրեն ասել են` մենք քեզ աշխատավարձ չենք տալիս, քանի որ դու մեր աշխատողը չես:
Քրիստինա ՄԻՐԶՈՅԱՆ
