Դիլիջանի միջազգային դպրոցին հարկային ու մաքսային արտոնություններ տրամադրելու հարցը հասարակության տարբեր խավերի կողմից միանշանակ չի ընդունվել:
Խորհրդարանում այդ օրինագծին «դեմ» էր քվեարկել ԱԺ ԲՀԿ-ական պատգամավոր Գուրգեն Արսենյանը՝ ասելով , թե «դեմ է ՀՀ սուվերեն շահերը փողով փոխելուն»:
Իսկ ՀԱԿ խմբակցության անդամ Նիկոլ Փաշինյանն էլ տարակուսանք էր հայտնել. «Իշխանության այլ ներկայացուցիչներ իրենց ելույթներում ակնարկեցին, որ եթե ԱԺ-ն տրամադրում է արտոնություններ, ապա Ռուբեն Վարդանյանը շարունակում է իրականացնել այդ ծրագիրը, եթե չի տալիս, նա դադարեցնո՞ւմ է այդ ծրագիրը»:
ՀՀ կառավարությունը երեկ պաշտոնապես հաստատել է «Դիլիջանի միջազգային դպրոց» ծրագիրը, այն իրականացնող կազմակերպությունների ցանկը: Որոշման ընդունմամբ ստեղծվում է համապատասխան ենթաօրենսդրական դաշտ` «Դիլիջանի միջազգային դպրոց» ծրագրի շրջանակներում հարկային և մաքսային արտոնություններ տրամադրելու մասին» ՀՀ օրենքի կիրառման համար: Հաջորդ որոշմամբ հաստատվել է նշված օրենքով սահմանված հարկային և մաքսային արտոնությունների կիրառության կարգը:
Aravot.am-ի հարցին, իր կարծիքով որո՞նք են Հայաստանի համար Դիլիջանի դպրոցի տված օգուտներն ու վնասները, պարոն Արսենյանը պատասխանեց, որ սկզբունքորեն դեմ չէ որեւէ դպրոցի կամ կրթական ծրագրի իրականացմանը մեր երկրում՝ ինքը դեմ է երկրի հաշվին լավություն անելուն. «Ես միշտ էլ դեմ եմ քվեարկել, երբ հարցը վերաբերվել է Հայաստանի հաշվին ցանկացած արտոնություն տրամադրելուն»:
Նրա ձեւակերպմամբ, իշխանություններն իրենց ապաշնորհությունը քողարկում են այս կամ այն նախագծին արտոնություններ տրամադրելով, մինչդեռ ինչ-որ մեկի՝ փող բերելը Հայաստան, ամենեւին էլ լավություն չէ: «Այդ իշխանություններն են անճարակ ու ապաշնորհ, ոչ թե հայ ժողովուրդը, որովհետեւ, եթե ժողովուրդն ապաշնորհ լիներ, դրսում այդքան հաջողությունների չէր հասնի»,-ասաց նա:
«Ռուսաստանից տարեկան միլիարդներով տրանսֆերտներ են մտնում Հայաստան, այսինքն՝ այդ մարդիկ լավություն են անում, որ այդպես է՝ թող նրանց էլ արտոնություններ տան»,-ասաց ԲՀԿ-ական պատգամավորը:
Գոհար ՀԱԿՈԲՅԱՆ
