Ինժեներ Արմեն Ջաղացպանյանը ստեղծել է նոր տիպի շարժիչի գյուտ, որն անհամեմատ խնայող է, քան մինչև հիմա գոյություն ունեցող շարժիչները։ Նրա գաղափարն արդեն տեղադրված է հայտնի կայքում: Հեղինակի համոզմամբ, իր գյուտի շնորհիվ կխնայվեն ոչ միայն մոլորակի վառելիքի պաշարները, այլև կապահովվի մթնոլորտի մաքրությունը՝ այրված գազերից։ Գաղտնիք չէ, որ օրեցօր ավելանում է մեքենաների թիվն աշխարհում, դրա հետ միասին ավելանում են մթնոլորտ արտանետվող գազերը, գնալով պակասում են նավթի պաշարները։ Արմեն Ջաղացպանյանի ստեղծած շարժիչի պարագայում արտանետումները ձգտում են 0-ի:
Aravot.am-ի հետ զրույցում պարոն Ջաղացպանյանը նշեց, որ իր ստեղծած ներքին այրման շարժիչն ավելի քան 2 -2, 5 անգամ խնայում է վառելիքի ծախսը: «Ուղղակի պետք է լինեն պատրաստի փորձանմուշներ, վերջնական արդյունքները այդ դեպքում կերեւան: Հնարավոր է՝ մինչեւ երեք անգամ էլ խնայի այս շարժիչը»,-նշեց մեր զրուցակիցը:
Ինժեները գյուտը ներկայացնելու եւ ֆինանսավորման խնդիր ունի: Նա նաեւ համոզված է, որ գյուտի իրականացումը ոչ միայն կբարձրացնի Հայաստանի հեղինակությունը մեքենա արտադրող և նավթ արդյունահանող երկրների աչքին, այլև իրական օգուտ կբերի ողջ մարդկությանը։
«Գյուտը ստացել է Հայաստանի պատենտ եւ միջազգային ընթացակարգով՝ Մտավոր սեփականության միջազգային կազմակերպության միջոցով, ամբողջ աշխարհում պատենտավորման գործընթաց իրականացնելու փուլում ենք: Սկզբի համար դժվարը ֆինանսավորման հարցն է: Անհրաժեշտ է մոտավորապես $100000-150000 գումար, որպեսզի ստացվի մի քանի փորձանմուշ, որոնցից մեկը կլինի քիչ թե շատ աշխատունակ, հնարավոր կլինի փորձարկումներ կատարել եւ ցուցադրել: Գլոբալ առումով՝ արտադրություն, գործարան եւ այլն՝ այդ ուղղությամբ դեռ չեմ մտածում, որովհետեւ մեծ ծախսերի հետ է կապված: Առաջի քայլը ֆինանսավորումն է:
Իր գյուտի մասին Արմեն Ջաղացպանյանը իրազեկել է կառավարությանը, ՀՀ նախագահին, ասում է. «Կառավարությունը փորձում է ինչ-ինչ լծակներ գտնել, որովհետեւ նման գործերը սովորաբար ֆինանսավորվում են վենչուրային հիմնադրամներից, մինչդեռ մեր երկրում նման հիմնադրամներ չկան: Ամեն դեպքում, ինձ խոստացել են, որ տարվա վերջին Հայաստանում եւս կստեղծվի վենչուրային հիմնադրամ եւ կկարողանան աջակցել»:
Հավելենք, որ մեր զրուցակիցը ինժեներական ոլորտում երկարամյա փորձ ունի, աշխատում է Պրոգրես տեխ Արմենիա ձեռնարկությունում, որը զբաղված է ինքնաթիռների նախագծմամբ:
Գոհար ՀԱԿՈԲՅԱՆ
