«Շինարարությունը կատարվելու է բացառապես սեփական տարածքում, միայն գազոնների հատվածում, զբոսայգուց հողազավթումները կամ ծառահատումները բացառվում են»,- «Առավոտի» հետ զրույցում վստահեցրեց «Գոլդեն Պալաս» հյուրանոց ՍՊԸ-ի գլխավոր տնօրեն Կարեն Ջանոյանը: Խնդիրն այն է, որ արդեն իսկ ահազանգեր են հնչել այն մասին, որ հյուրանոցի հետնամասում շինարարական աշխատանքներ են ընթանում, որոնք ուղեկցվում են ծառահատումներով: Պարոն Ջանոյանը վստահեցրեց, որ հյուրանոցի հետնամասում այս պահին ոչ մի շինարարական աշխատանք չի տարվում. «Ընդամենը կատարվել են հետազոտական աշխատանքներ. ուսումնասիրվել է հյուրանոցի հետնամասի գրունտի ամրությունը, ճշտում է կատարվել՝ արդյոք հնարավո՞ր է այդտեղ շինարարություն անել, թե՞ ոչ»,- ասաց մեր զրուցակիցը՝ հավաստիացնելով, որ շինարարություն կատարելուց առաջ օրենքով սահմանված բոլոր փաստաթղթերը կձեւակերպվեն, թույլտվությունները կլինեն, ապա միայն շինարարությունը կսկսվի. «Ոչ մի ապօրինի շինարարություն չկա եւ ոչ մի ապօրինի շինարարություն մեզ մոտ չի լինելու»: Պատասխանելով հարցին, թե ի՞նչ շինության մասին է խոսքը, մեր զրուցակիցը մանրամասնեց, որ հյուրանոցի սեփականատերերը որոշել են ընդլայնել հյուրանոցը, բնականաբար՝ նաեւ իրենց բիզնեսը՝ հաշվի առնելով վերջին տարիներին տուրիզմի աճը Հայաստանում եւ հյուրանոցների խիստ պակասը: Կատարվելու են լրացուցիչ օտարերկրյա ներդրումներ, շինարարության ընթացքում լինելու են լրացուցիչ աշխատատեղեր, իսկ ավարտից հետո կստեղծվեն նաեւ նոր աշխատատեղեր հայաստանյան շուկայում: Նա եւս մեկ անգամ շեշտեց, որ այս պահին ընդամենն ընթանում են չափագրման աշխատանքներ, որպեսզի դիտարկվեն հյուրանոցային տնտեսության ընդլայնման հնարավորությունները:
Կարեն Ջանոյանը նաեւ ասաց, որ իրենք պատրաստ են համարակալել բոլոր շրջակա ծառերը, եւ շինարարության ավարտից հետո եթե որոշ ծառեր չլինեն, բացի նրանից, որ պատրաստ են վճարել տուգանքները, նաեւ ամեն հատված ծառի փոխարեն պարտավորվում են տնկել 10-15 նոր ծառ: «Եթե բնակարանաշինության համար հնարավոր է չմտածել կանաչ գոտիների մասին, հյուրանոցի պարագայում պարտադիր է մտածել կանաչ գոտու մասին: Մանավանդ, որ «Գոլդեն Պալասը» տարբերվում է երեւանյան մյուս հյուրանոցներից հենց իր կանաչ, բարեկարգ շրջապատով: Բացի որակյալ սպասարկումից՝ մեր մշտական հյուրերը նաեւ շրջակա միջավայրի եւ մաքուր օդի համար են նախընտրում մեր հյուրանոցը»,- հավելեց մեր զրուցակիցը:
ՆԵԼԼԻ ԳՐԻԳՈՐՅԱՆ
«Առավոտ» օրաթերթ
