Այսօր ԵՊՀ մի խումբ ուսանողներ դասադուլ էին հայտարարել եւ բողոքի ակցիա էին անցկացնում ԵԱՀԿ երեւանյան գրասենյակի դիմաց:
«Հայ երիտասարդները քնած չեն եւ պատրաստ են լինել մեր զինվորների կողքին»,- գրասենյակի դիմաց հայտարարեցին ուսանողները եւ «պահանջում ենք արդարություն» կոչերով մոտեցան գրասենյակին:
Ուսանողները բողոքում էին ԵԱՀԿ-ի անտարբերությունից եւ լռությունից՝ հոկտեմբերի 22-ին Տավուշի մարզի Պառավաքար հատվածում ադրբեջանցիների կողմից սպանված հայ զինծառայողի դեպքին:
«Ադրբեջանցիների հերթական սադրանքն էր: Ավտոճանապարհով քաղաքացիական եւ զինվորական մեքենաների վրա ադրբեջանական կողմի արձակած կրակահերթից զոհվեց ժամկետային զինծառայող: Զինադադարի պայմաններում միջազգային կառույցների ադրբեջանական ագրեսիայի հանդեպ անտարբեր վերաբերմունքը եւս մեկ զինծառայողի մահվան պատճառ դարձավ: Հատկապես մտահոգիչ է ԼՂՀ հիմնախնդրի խաղաղ կարգավորման գործընթացում միջնորդական առաքելություն իրականացնող ԵԱՀԿ-ի անտարբերությունը: Դատապարտում ենք ադրբեջանական իշխանությունների հերթական կեղտոտ սադրանքը»,- ասաց ԵՊՀ ուսխորհրդի նախագահը:
Կարդացեք նաև
Ուսանողներին գրասենյակից ոչ ոք չդիմավորեց, ավելի ուշ ներսից հայտնեցին, որ գրասենյակի ղեկավար Անդրեյ Սորոկինը գրասենյակում չէ: Բայց ուսանողները սպասեցին այնքան, մինչեւ նա եկավ եւ նրան հանձնեցին իրենց գրավոր դժգոհությունը: Սորոկինը խոստացավ ծանոթանալ դեպքին եւ արձագանքել:
Արփինե ՍԻՄՈՆՅԱՆ
