ՀՀ քաղավիացիայի ոլորտն ազատականացվում է. Այսօր կառավարության նիստում ՀՀ էկոնոմիկայի նախարար Վահրամ Ավանեսյանն ասաց, որ սկսվելու է քաղավիացիայի ոլորտի ամբողջական ազատականացումը, կատարվելու են կառուցվածքային փոփոխություններ: Ըստ նախարարի, հաստատվելու են ոլորտին վերաբերող չափանիշները, ըստ որոնց էլ կարգավորվելու են տեղական ավիաընկերությունների աշխատանքները, նրանց լիցենզավորման կարգն ու հիմնադրույթները:
Նիստում քաղավիացիայի վարչությունից եւ տնտեսական պաշտպանության պետական հանձնաժողովից տեղեկացրեցին, որ դիտարկումներ ունեն հայեցակարգի վերաբերյալ, եւ ժամանակ խնդրեցին հայեցակարգին ծանոթանալու եւ շտկումներ կատարելու համար:
ՀՀ վարչապետ Տիգրան Սարգսյանն էլ ասաց, որ ոլորտի ազատականացման վերաբերյալ բուռն քննարկումներ են եղել, իրարամերժ կարծիքներ՝ ոլորտի խիստ կարգավորման տարբերակից մինչեւ առավելագույն ազատականացման տարբերակը. «Հայաստանը պետք է գնա ազատականացման ճանապարհով, ինչը խթանելու է ՀՆԱ-ի աճը, ստեղծելու է նոր աշխատատեղեր, դարձնելու է ուղեւորափոխադրումները հարմարավետ, գները նվազելու են»:
Վարչապետի խոսքերով՝ հայեցակարգի մշակման համար աշխատել են աշխարհահռչակ «Մաքքենզի» ընկերության մասնագետները, որոնք էլ մշակել են ՀՀ քաղավիացիայի ոլորտի ռազմավարությունը, այս հարցը քննարկվել է նաեւ ՀՀ նախագահի մոտ: Դեռ մի քանի օր էլ ոլորտի շահագրգիռ կողմերը պետք է աշխատեն միջազգային ընկերության մասնագետների հետ եւ փաստաթուղթը տեղայնացնեն ու վերջնական այն ներկայացվի:
Կարդացեք նաև
Նելլի ԲԱԲԱՅԱՆ
